{ SKIP }
文:MenClub John Chan  
POSTED ON 19 Jun 2017

Photos & Video: Heat Production

SUV勢盛,選擇多,要揀一部真係啱自己,唔係咁易。 

從男人角度睇,喺香港揸SUV,最緊要好揸,即使呢類車擺到明「膊頭闊啲」「身型高大啲」,但總希望自己嗰部喺扭軚、過線、出入彎靈活啲。 

時下講求引擎效能,唔少歐洲或日本SUV,都轉用渦輪增壓(Turbo)引擎,Turbo引擎有佢優點,但缺點係引擎聲呆板,唔夠立體,一句到尾:易悶。

對玩開高性能汽車(尤其是自然吸氣引擎fans)嘅用家嚟講,真係會幾失落。




今次試Jaguar F-PACE嘅其中一個原因,係因為佢靚聲,而且把聲夠惡。 

Jaguar Hong Kong最近推出Midnight Test Drive。

工作關係,試車試得多,約九成半試車都喺日間進行,偶有長測(long-term test),我會選擇晚飯後至深夜試車。我唔係想做黑夜飛車手(通街「快相機」、鐳射槍、邊有可能),只係趁住暢通路況,喺自己鍾意嘅路段,揸得順啲、爽啲,你知啦,日頭重型車、巴士咁多,開開停停,好冇癮㗎。



夜晚試車另一好處,係心情輕鬆好多,除非你單身兼唔使返工日日玩,否則日頭WhatsApp message接個不停,難得放工後可以似返個人,有私人空間做自己鍾意嘅事。

香港夜景仲係好靚,今次我由白加道出發,經馬己仙峽道、花園道、金鍾、中環、「蘇豪區」一帶,有落斜、慢彎、暗斜,短短約半小時的車程,已有齊多種地形同路況,好快就了解到F-PACE嘅行車表現、引擎同波箱特性,當然,唔少得感受乘坐舒適性。



試揸嘅F-PACE 35t Prestige版本,配3公升V6超級增壓(Supercharged)引擎,最大馬力340匹,峰值扭力46kgm。

代理人員將F-PACE揸到白加道與我會合,雖然路窄車慢,但已清楚感受到引擎調子,稍稍加速,「嗷…嗷…」,相當雄厚,望吓佢嘅頭燈同「鬼面罩」,不怒而威,英國汽車雜誌經常話:「每部Jaguar都有豹嘅DNA」我,真的信了。



喺中環擺花街、雪廠街、荷李活道一帶嘅舊路窄街慢揸,F-PACE比我想像中靈活、輕鬆得多,當時附近餐廳、酒吧門外有唔少客人嘅座駕,我輕輕一扭已避過,無需刻意左顧右盼,以F-PACE所屬級別嘅SUV而言,佢算係「好易睇位」嘅一部。 

香港斜路多,有部份SUV用家都覺得,不妨買容積大啲,汽缸數目更多嘅高階版本,但我覺得F-PACE 35t Prestige嘅引擎配搭已經相當夠用,喺跑味、性能同耗油呢三方面,取得咗平衡。

引擎低扭好飽滿,運轉滑溜,低轉緩速行車再加速,韌度十足,轉數亦上得快,你要多啲power咩?一篤油就即時湧出嚟。



離開中環,沿港島北岸至西環一帶嘅天橋行車,望晒三條行車線,只得我同F-PACE,轉去Dynamic模式,引擎聲即時變得高吭,以為F-TYPE跑車「上身」,畀腳大油,「哄哄……」,好惡喎! 

呢副8前速自動波箱同引擎幾合拍,喺Dynamic模式嘅傳動質感好紮實、肯定,手動拖波反應雖未至拳拳到肉,兜錘「窩」落你心口,但十分緊湊,有驚喜。


F-PACE波檔旋鈕造工好精緻,唔係傳統波棍頭可比

見到「格仔旗」就知係Dynamic行車模式


無論低、中、高轉區域,呢副超級增壓引擎都有清晰嘅「起、承、轉、合」,喺三號幹線奧海城段對出嘅大直路作短途加速,儘管只係十秒內嘅閃快過程,但已經非常之爽,以本港有售嘅3公升級增壓型(Turbo/Supercharged)引擎同8速波箱而言,我覺得佢得分好高。 

Jaguar房車、跑車一向好揸、靈巧,F-PACE都有呢種特質,佢配鋁合金底盤,整個車體結構有80%以高強度同高抗扭度嘅鋁合金製造,車身雖達4.75米、闊2.17米、高1.66米,但車重只有1820kg,比唔少同級車輕巧。



剛才提過F-PACE喺中環同山頂窄路過彎靈活,去到西九龍同昂船洲一帶嘅迴旋處、慢彎,同樣咁流暢,甚少出現部份SUV對手過彎硬繃嘅缺點。 

F-PACE有咁嘅表現,我覺得大致有兩大原因。

首先,整部車嘅重量分布得幾平均,你坐上駕駛席,喺上落斜兜十個八個彎已feel得到,我尤其滿意F-PACE嘅車頭,唔算重,先天已有利車頭有更爽快嘅入彎動態;另外,F-PACE四驅系統,出發點已同主流好唔同,內置嘅Intelligent Driveline Dynamics(IDD),大體上保留前置引擎後輪驅動(FR)佈局嘅靈活,揸落就好似一部高身少少嘅FR四門車,好smooth,但當前輪需要動力,IDD系統又可於0.2秒內將動力沿沿送到前輪,達到四驅系統應有嘅安全表現。

懸掛韌中帶柔,揸同坐都好feel,其實幾有德國SUV味,再搵唔到N年前英國高級SUV嗰種軟淋淋嘅過時感覺,咁嘅tuning絕對係好事!










F-PACE嘅引擎性格鮮明,操控亦算醒目俐落,加埋650公升超大行李空間(可擴展至1740公升),整體而言好全面,但亦不失Jaguar嘅特有風格,尤其係對引擎靚聲嘅堅持,值得俾多幾個Like。

Jaguar Midnight Test Drive 登記網址

https://goo.gl/T0U6Lv


Jaguar F-PACE 35t Prestige規格

售價:$698,800起

代理:Jaguar Cars Hong Kong www.jaguar.com.hk 

車型:五門五座

體積:(長)4731mm x (闊 )2175mm x (高)1667mm

軸距:2874mm

引擎:2995c.c. V型6汽缸超級增壓,前置引擎

口徑 x 衝程:84.5mm x 89.0mm

壓縮比:10.5:1

馬力:340匹/6500rpm

扭力:46kgm/4500rpm

波箱:8前速自動,四輪驅動

0至100km/h加速:5.8秒

極速:250km/h

懸掛:(前)雙搖臂;(後)多連桿

制動:(前)透氣碟;(後 )透氣碟

車重:1820kg

行李艙:650公升(可擴展至1740公升)

油缸容積:63公升

耗油:8.9公升/100km

身邊總有幾個唔使做、唔使返工,成日周遊列國嘅朋友,間中又會聽到佢哋講:「返乜鬼工吖,度吓去邊度玩好過啦!」
auto
【仲做?放假啦!】Ferrari Cavalcade 揸愛車看亞德里亞海
28 Jun 2017
有關積架(Jaguar)會製作一部歷來最大馬力房車嘅傳聞,聽咗有兩、三年。唔使再傳喇,XE SV Project 8正式發表。
auto
【四驅.600匹】最大馬力Jaguar XE SV Project 8
28 Jun 2017