{ SKIP }
文:MenClub John Chan  
POSTED ON 17 Jun 2017

Photos & Video: Heat Production 

身邊玩車嘅朋友都曾經話:「以前喺香港『玩車』同『用車』都有好多選擇,唔同類型,各種牌子嘅車都各有擁躉,嗰時大家會定期約出嚟飲茶,傾車經……」 

呢類回望同感嘆,我聽咗十幾年,由好多人講,到講嘅人愈來愈少。

可能,大家已經習慣咗。 

雪鐵龍(Citroën)喺香港算係相對冷門嘅品牌,今次仲要講一款已經停產兼產量低嘅旗艦——C6,我預咗讀者「反應」有限。但係,一年52個星期,偶一介紹呢類被稱為「雪條」嘅冷門車,無傷大雅。



C6產量少,總計7個年度嘅生產期,只有約23000部。

據非正式統計,亞洲區最多C6嘅地區,極可能係日本、其次係台灣、大陸及新加坡,香港呢?我諗活存至今的數量,相信在個位數以內,甚至五隻手指已夠用有餘。 

呢部C6,2008年製造。現任車主最近喺易手車巿買入,拍攝當日佢show「牌簿」我睇,原來當年淨車價卅幾萬,加上接近22萬稅,總車價約55萬。

問吓車主幾錢買入,佢話:「唔好問啦,唔貴嘅,都算合理」

「哦!」

喺2008年揸住「半球」多啲,夠買寶馬E60型款尾嘅530i。相信大部份買歐洲行政級房車嘅人,都唔會揀C6,呢樣好好好好好肯定。





我向大家坦白,我好鍾意C6,早喺2003年採訪巴黎車展,已經set腳架同C6嘅概念車C6 Lignage合照,平時採訪車展,衝呀衝呀衝,我絕少咁樣。

鍾意呢類外形靚,size唔太大嘅四/五門車,奧迪(Audi)第一代A5 Sportback、寶馬(BMW)4系GranCoupe同Mazda6都係「賣飛佛」。


Citroën 2003年概念車C6 Lignage

「頭長.尾短」係Citroën旗艦房車嘅招牌比例

CX車系(1975-1991),1975年歐洲Car of the Year

XM車系(1991-1997),1990年歐洲Car of the Year



輸港C6所配嘅211匹/215匹(視乎計算單位)V6自然吸氣引擎,扭力唔算標青,30kgm都未夠,即使以2005年嘅標準嚟講,都係有少少below average。

呢款ES系列嘅V6引擎,歷史可追溯至20年前,當時正值406車系推出不久,ES取代服役多年嘅PRV(Peugeot Renault Volvo喺70年代中晚期聯手開發共用,因而得名)系列機器。

籠統去講,動力輸出偏向陰柔,滑轉順滑,但轉數上升唔算快。自2800rpm起至4500rpm呢個區域力度幾厚,中高轉尚算寧靜。當然,論牛勁,肯定同寶馬嘅直六3公升機器冇得揮。

不過,咁嘅性格反而同6前速自動波箱好合拍,呢部C6行咗6萬幾公里,波箱仲好精神、暢滑。


ES9引擎唔算慳油,廠方喺2009年以3公升V6柴油Turbo引擎取代,3.0 V6生產期只有四年


我最初以為呢部C6冷氣唔夠凍,點知坐到入去,好涼爽,估佢唔到。

閂埋門,喺平滑柏油路行車,竟然幾靜,冇乜雜聲;但係起伏大啲嘅舊路揸,會聽到懸掛搖臂有啲雜響。都正常嘅,接近十年車,車重1.8噸,屬重磅車,我唔信過往嘅車主會好心機到,揸去車房換「雞髀」又或懸掛杯士囉。 

雪鐵龍高階型號或中高階型號嘅最高級別(Grade),都可配搭液壓懸掛,片中我稱「液壓懸掛」只為方便,正確應稱為液壓氣動懸掛,呢套系統包括氣囊、礦物油(液體)同電子組件。

系統有自動模式,可根據車速或路面狀態自行升降車身離地距;用家亦可自行調節離地距。



全車有7個氣囊


懸掛有兩個模式:Normal同Sport。Normal嘅表現最好,感覺十分獨特,有種好飽滿嘅力量承托住整部車,但又唔會太過硬,快速駛過天橋接駁位,完全不覺有明顯震盪或聲響,須知道呢部行貨(由雪朗汽車引入)配245/45 R18輪胎及原裝輪圈,加上車胎已屆更換年期,ride quality無理由咁好㗎喎!

無言之中只能再補一句預咗你鬧我嘅廢話:「真係好特別!」




車頂天花有輕微「跌頂」(天花襯布脫落)情況

前驅車,後座冇中槽,腳位相當闊落,座椅好舒服,加上冷氣夠凍,好易瞓著

後座設有兩個點煙器,前座又有一個,來來來,一齊「煲」返夠本


轉去Sport,firm咗好多,尤其是車頭動態,喺啲落差較大嘅快彎上落十轉八轉,有歐洲高級行政房車應有嘅穩當與剛健,但轉用Sport模式,即時覺得後懸雜響多咗,又未至於密雜煩擾嗰類,只係駛過渠蓋或起伏位就有響聲,絕對可以接受嘅,不過同剛才Normal嗰種「如坐飛氈」嘅妙絕感覺,對比實在太大。 

所以,C6係應該舒舒服服,輕鬆寫意咁揸,呢個亦係佢設計時嘅目標。咁嘅懸掛設計與調校取向,係今日「任何車都想Sport」嘅大氣候,難免被人睇唔起,覺得C6「outdated」。





配備液壓氣動懸掛嘅八、九十年代雪鐵龍型號,好多都因為耐用性差遭受惡評。我參考過少部份日本同英國C6用家嘅網上貼文,大多滿意呢套懸掛可靠度,唯獨中槽、中控台部份軟膠飾件,因表面嘅仿磨砂塗層溶解,變成「黐笠笠」就屢被痛罵(相近情況亦見於同期Audi A4同第四代Golf GTI)。

易手價方面,C6喺英國多本著名汽車雜誌都被評為「Heavy Depreciation」,但話分兩頭,易手價差,唔一定等於部車本質好差嘅。



近六、七年嘅雪鐵龍新車有咗進步好大,應該咁講:法國車喺德國車盛勢同歐產日本品牌兩路夾擊,唯一求生方法就係快速改革產品質素。唔睇香港巿場,雷諾、標致(前稱標緻)同雪鐵龍汽車喺歐洲、日本、台灣、東南亞、澳紐嘅評價,以至當地消費者組織嘅滿意度都大有改善,部份型號嘅耐用指數更與「歐製日本車」及二線德國車看齊。



放心,唔係「毒」你買法國車,你立定心意下半世繼續數臭法國車,悉隨尊便。我只係想搭多句,倘若你還未至與法國車不共戴天,將來去歐洲自駕遊,不妨考慮租部最新嘅法國車。

就算日後圍爐「插」法國車,你都曾經算係「持份者」,有最新嘅database喺手,插都插得狠啲,鬧都鬧得實在啲,唔好人云亦云。



Citroën C6 V6 3.0規格

售價:2008年新車價約55萬

車型:四門五座

體積:(長)4908mm x (闊 )1860mm x (高)1464mm

軸距:2900mm

引擎:2946c.c. V型6汽缸DOHC 24活瓣自然吸氣,前置引擎

口徑 x 衝程:87mm x 82.6mm

壓縮比:10.9:1

馬力:211匹/6000rpm

扭力:29.6kgm/3750rpm

波箱:6前速自動,前輪驅動

懸掛:(前)多連桿;(後)多連桿

制動:(前)透氣碟;(後 )實心碟

車重:1820kg

行李艙容積:407公升

油缸容積:72公升

0至100km/h加速:10秒

極速:230km/h

耗油:11.2L/100km(公路及巿區測計模式)

輪胎:245/45 R18(前、後)


身邊總有幾個唔使做、唔使返工,成日周遊列國嘅朋友,間中又會聽到佢哋講:「返乜鬼工吖,度吓去邊度玩好過啦!」
auto
【仲做?放假啦!】Ferrari Cavalcade 揸愛車看亞德里亞海
28 Jun 2017
有關積架(Jaguar)會製作一部歷來最大馬力房車嘅傳聞,聽咗有兩、三年。唔使再傳喇,XE SV Project 8正式發表。
auto
【四驅.600匹】最大馬力Jaguar XE SV Project 8
28 Jun 2017