{ SKIP }
文:MenClub John Chan  
POSTED ON 29 Jul 2017

Photos & Video: Heat Production

《香港鐵金剛》呢條題,我喺任職《人車誌》(Car and Driver)編輯時曾經用過,大概係8至9年前,嗰次都係試Aston Martin。 

喺黑白粵語片流行嘅60年代,唔少人都覺得男演員周驄(即係問許紹雄個「SIR」字點寫嗰位伯伯)同謝賢,都係「香港鐵金剛」,佢哋著件深色靚西裝(以當年標準)、外貌俊朗、身型靚、喺戲中打得兩下,英雄救美,又或者同靚女出雙入對,有時仲揸住靚跑車去吓雍雅山房或華爾登酒店歎咖啡。

能夠有齊咁嘅形象、咁嘅魅力、咁嘅伴侶、咁嘅生活,我諗冇幾多個男人唔想。



我鍾意睇占士邦電影,但未至於超級忠實霹靂無敵兼無所不知,我一直覺得Aston Martin嘅汽車好有型,Goldfinger年代嘅DB5、鐵摩達頓(Timothy Dalton)年代嘅Vantage Volante同從未喺「邦片」出現嘅Rapide房車,呢三部我都好Like,但呢三款車對我嚟講都幾離地,尤其DB5,如果能夠擁有呢部車,就等如可以娶「1962年版本」邦女郎Daniela Bianchi做老婆咁Magic。




我仲記得2005年3月採訪瑞士日內瓦車展,見到剛發表嘅全新Vantage車系嗰陣,我記得腦裏「閃」咗一吓:「六、七年後,呢部我有機會買得起喎!」呢類鼓勵自己搏命啲搵錢嘅想法,最終有冇成真唔係重點,想講嘅係,Vantage 4.3 V8呢種Package,的確向普羅車迷走近咗一大步。大哥,發白日夢都有個譜嘛。





2013年,我曾以特約編輯身份,到英國做咗個名貴跑車汽車俱樂部專題,喺幾日半玩半工作嘅行程中,揸過有十多款唔同時期嘅跑車同超跑,有三、四款令我留下深刻印象,當中包括Vantage 4.3 6速棍波。 

當時報道嘅焦點,當然唔係部「馬田」Vantage,所以即使試完好有feel,都冇寫到出嚟,最近有讀者問我哋有冇興趣試Vantage,而且係6速棍,我好開心,始終好車係想耐不耐有機會見吓、揸吓。





可能因為時任CEO Ulrich Bez嘅背景闗係,我總覺得呢部車有別於一般嘅英國Coupe,Vantage擁有幾濃嘅歐洲大陸跑車味道,尤其係有陣德國「除」,而且我幾Like兩座位Coupe,所以你而家問我,邊款現有發售嘅Aston Martin最順眼,我仍然係揀Vantage。 

Vantage嘅對手有兩類,一類係同佢相近售價嘅對手,例如瑪莎拉蒂GranTurismo;另一類係體積或車重相近嘅對手,仲有邊啲係佢嘅對手,就按你喜好決定吧,所謂對手唔對手,本來就無清晰定義。





論操控,我覺得佢無997型911 Carrera S咁惹味,咁肉緊,咁細緻,咁有「表演慾」;但講重量分布平衡度,Vantage的確相當好,車輪同懸掛嘅反應都好穩當,你以為佢真係四平八穩「一堆肥肉」,錯喇,揸耐少少,即使唔係刻意用低一個波,逼車尾走嚟走去,佢都可以顯示佢具備豐富抓著力之餘,亦有少少受控嘅橫走。




表面睇,Vantage係一部滿身Muscle嘅英國「大力牛」囉。

其實,佢粗中有細,Transaxle格局、引擎放喺前軸與駕駛艙之間,即係前中置佈局,先天擁有極佳嘅重量分布比例(49:51)。我好少quote亦好怕見到呢類「乜乜近乎完美」嘅重量分布比例,但Vantage揸落嘅動態真係好balance,唔論盡,即使車重接近1.6噸,喺彎路快揸,出奇地竟然仲有少少輕巧嘅味道。





在我個人而言,Vantage嘅缺點唔算好多,我好認同少部份英國行家嘅觀點,就係想呢款4.3機器,喺中段(即約3000rpm至5000rpm)有厚少少嘅韌力,一為實質需要,令用家可以喺3、4波低轉更輕易重新發力,以至作短途突圍;另方面,想佢有更鮮明嘅V8自然吸氣味道。目前嘅設定係:引擎轉數上得夠快,係勤力嘅、夠晒「爽」、運轉亦好穩定,只係想喺上述轉速有再多少少蠻力。









所以,呢款4.3 V8自然吸氣引擎,其實係「幾唔似傳統V8嘅V8」,完全冇歐洲大陸相近時期及相近容積產品嗰種慵懶。如果嗰個時期嘅V8自然吸氣引擎,真係冇可能做到蠻力與「轉數上得快」並存,咁我寧願揀後者。

片中提及Vantage車系歷年有4次召回行動,內容如下:

2006年2月第1次召回:涉及2006年2月至2005年10月製造之型號;原因,電器故障,引致引擎無法啟動。

2009年8月第2次召回:涉及2009年4月至7月製造之型號;原因,前副車架鬆脫。

2012年12月第3次召回,涉及2009年4月至2012年9月製造之型號;原因,輪呔氣壓監察軟件事故

2014年12月第4次召回,涉及2006年6月至2014年11月製造之型號;原因,發熱座椅組件可能出現過熱情況。


撇開對汽車品牌嘅情感或偏好,我相信,鍾意997型911 Carrera S,好大機會鍾意呢款Vantage 4.3 V8,佢哋就好似古裝情慾片嘅一對「好姊妹」,互相補足,我相信大多數男人都想擁有晒呢兩款車嘅優點。

啱喇,如果時代同條件都容許你「左擁右抱」,Go Go Go啦,唔好扭扭擰擰,錯過機會,過後長嗟短嘆。N年後喺運輸署遇到你排隊等續牌,同啲三唔識七嘅人搭訕,突然爆一句:「如果我當年買埋部Vantage就點點點喇!」

兄弟們,千祈唔好做呢種戇居佬!

Aston Martin Vantage 4.3 V8 6MT規格

車型:三門兩座

體積:(長)4382mm x (闊)1866mm x (高)1255mm

軸距:2600mm

引擎:4280c.c. V型8汽缸32活瓣自然吸氣,前置引擎

壓縮比:11.3:1

馬力:380匹/7300rpm

扭力:41.7kgm/5000rpm

波箱:6前速手動,後輪驅動

懸掛:(前)雙搖臂;(後)雙搖臂

制動:(前)透氣碟;(後)透氣碟

0至100km/h加速:5秒

極速:282km/h

油缸容積:77公升

車重:1580kg(淨重)

輪胎尺碼:235/45 R18(前)275/40 R18(後)

寶馬同豐田聯手合作嘅跑車計劃(Z4/Supra)講咗幾年,寶馬呢邊嘅新Z4啱啱公布,實物已經亮相美國加州圓石灘(Pebble Beach)汽車節
auto
【右軚版來年中投產】BMW Concept Z4大咗成個碼
18 Aug 2017
早排睇Subaru日本網頁,無意中發現WRX車系(前稱Impreza WRX)原來已有四份一世紀。
auto
「快.狠.定」──Subaru WRX STI
17 Aug 2017