{ SKIP }
文:MenClub John Chan  
POSTED ON 29 Aug 2017

Photos & Video: Heat Production

有啲汽車,喺車壇有著無可代替嘅顯赫地位,好大程度因為佢哋「有今世,冇來世」,尤其是一啲喺獨特人、事組合背境下生產嘅汽車。 

好嘅例子有唔少,例如奧迪(Audi)RS 2 Avant。 

90年代初中期嘅保時捷,財政狀況欠佳,廠方曾經利用既有生產線為平治(Mercedes-Benz)代工生產E500/500E,又為奧迪(Audi)改裝S2 Avant(即是RS 2 Avant)。

今日嘅保時捷,仲邊得閒,亦都無需要「接呢類Job」。所以,買RS 2 Avant,唔單止係買一部超級旅行車,更加係買埋嗰段時期嘅歷史。



RS 2 Avant嘅高性能旅行車配方,唔算破天荒,畢竟,當時寶馬(BMW)E34型M5旅行車已賣咗好一段時間。不過,講到配備四輪驅動系統,又有大馬力輸出,兼且配渦輪增壓引擎,RS 2 Avant肯定開車壇先河。



RS 2 Avant推出時,我仍是一名中學生,嗰時我經常到公共圖書館睇英國汽車雜誌。當知道奧迪同保時捷聯手製作一部「超級旅行車」,我係相當興奮。

過咗冇耐,我記得有一期《車王》雜誌以RS 2 Avant做封面,該雜誌編輯親身到德國,向廠方借來RS 2 Avant試車,嗰本《車王》我仲有keep住,唔捨得掉。

RS 2 Avant當年行貨新車價約為84萬港元,如果唔係靠「黐住保時捷牌頭」,以當年奧迪嘅品牌身價,邊有可能賣到咁貴。




標題話RS 2 Avant係「超級旅行車」,一啲都冇言過其實。睇睇同期嘅993型911 Carrera,最大馬力不過係272匹,993 Turbo呢?408匹,即使係993型GT2,亦不過係450匹。315匹馬力嘅RS 2 Avant,毫無疑問已踩入「超級」門檻。



喺B5型S4或第一代RS 4 Avant面世之前,Audi著實欠缺一副見得人嘅高性能引擎,畢竟沿自Quattro Coupe嘅2.2公升直列5汽缸Turbo引擎,自90年代初轉用每汽缸5活瓣技術之後,已經冇重大技術突破。

所以,當保時捷接過由奧迪送過嚟嘅S2 Avant 220匹直五Turbo引擎,都只係以最old skool嘅方法升級,就係換一個體積大30%嘅渦輪增壓器、效能更高嘅中冷器同進、排氣系統,將最大馬力由220匹增至315匹。




多年來,我先後試揸過3部RS 2 Avant,當中以今次呢部嘅引擎最精神,尤其是運轉質感,又爽又順,以前嗰2部總係有少少提唔起勁。據車主講,渦輪增壓器係全新嘅,引擎亦曾經大修,唔怪得咁情神啦!

RS 2 Avant嘅低轉扭力唔算不濟,畢竟容積達2.2公升,亦屬直五格局,唔會差得去邊,但渦輪滯遲情況非常明顯,從3000轉/分至3500轉/分呢段,動力驟然勁升,當穿越3500轉/分之後,只要你夠膽踩深入門,轉速錶指針係毫不猶疑直撲6000轉/分,直至6800轉/分依然係猛勁十足。




我同車主閒聊幾句,佢話:「而家啲Turbo新車,的確好順好舒服,扭力好,又慳油,但就冇咗以前Turbo車大Turbo Lag嘅特色。」

人就係咁,有嗰陣又唔稀罕,都冇嗰陣就經常懷愐。




喺非繁忙時段嘅高速公路作猛烈加速,超好玩,而且直五引擎嘅叫響實在非常特別,我輩係睇港京拉力賽長大嘅,早期嘅A2組別555香煙拉花Audi Quattro賽車,就喺響住呢把咁獨特嘅引擎靚聲,由尖沙咀新世界中心「爆」到上北京天安門。

差啲以為自己變身成為80年代初中期Audi Sport嘅巨星級車手,包括Walter Rohrl、布傑斯(Stig Blomqvist)、米雪.莫頓(Michele Mouton)。



用今日嘅汽車標準,睇呢部保養水準不俗的RS 2 Avant,略嫌猛烈加速時嘅車頭上仰幅度稍大,你睇吓相近時期嘅《Best Motoring》,R32 Skyline GT-R都有類近情況。RS 2 Avant嘅quattro四驅系統,仍然係相當舊派設定,過彎好易轉向不足。

當Turbo全情介入嗰刻,動力傾瀉而至,變相加劇轉向不足。另外,轉向輔助力度偏大同軚感模糊,或多或少影響咗駕駛者捉模RS 2 Avant嘅動態同節奏。

有位曾經接受過越野賽車駕駛訓練嘅歐洲行家同我講,開RS 2 Avant,不妨多用left foot braking,過彎時會更暢順。








有說,現存右軚版RS 2 Avant數量不多於100部,主要分布喺英國、澳紐、南非及香港等地,易手價由10,000英鎊起至80,000英鎊都有,後者當然是低累積行駛里數,內外狀態理想嘅「筍盤」,值唔值得將咁大budget投放落一款23年車齡嘅舊Audi,好睇你「中毒程度」,車主同我講,佢話「太太最初都唔明佢點解要買呢部Audi」。


RS 2 Avant偶會出現零件供應緊張,又或零件售價偏高。例如空氣流速感應器(MAF;Mass Air Flow Sensor),喺其他日本私家車車系,本來只係千零蚊有找嘅裝置,但RS 2 Avant與968車系共用同一零件,加上產量少,廠方亦只採取「一換一」維修方式,所以售價動輒可達七、八千港元。「我問你死未!」。

原裝嘅藍絲絨與黑真皮混合桶型座椅,坐感仍不錯,但藍色部份嘅絨布(駕駛席)已有輕微「甩毛」情況,車主講笑話:「曾經諗過拎去真皮座椅公司,改換成全真皮座椅……」我立即忍唔住打斷插一句:「巴打,你諗清楚好喎!」


RS 2 Avant係性格非常鮮明嘅高性能汽車,佢有唔少喺操控同設定上令人費解嘅缺點,但佢0至100km/h加速4.8秒嘅強勁起跑反應,循跡性極高嘅濕路行車表現,以至又惡又響嘅縱置直五Turbo引擎聲,都係「有今生,冇來世」。 

如果當年右軚版產量有五、六百部,或者更多,咁就好喇!



Audi RS 2 Avant規格

車型:五門五座

體積:(長)4496mm x (闊)1702mm x (高)1397mm

軸距:2591mm

引擎:2226c.c. 直列5汽缸20活瓣渦輪增壓,縱置,前置引擎

壓縮比:9.0:1

馬力:315匹/6500rpm

扭力:41.8kgm/3000rpm

波箱:6前速手動,四輪驅動

懸掛:(前)雙搖臂;(後)雙搖臂

制動:(前)透氣碟;(後)透氣碟

0至100km/h加速:4.8秒

極速:262km/h

油缸容積:64公升

車重:1580kg(淨重)

輪胎尺碼:245/40 ZR17(前、後)

呢部620係咪大家見過最靚嘅改裝車?大概都唔會係。但今時今日仲有位年青人會同爸爸一齊落手落腳改裝一部車,呢份父子情就實屬難得。
auto
父子的浪漫 沖繩改裝Pick Up Truck
19 Nov 2017
Tesla在昨晚活動中公布了他們第一部電動貨車:Semi,以及第二代Roadster,你沒看錯,的確是第二代Roadster。
auto
Tesla連環出擊:1.9秒Roadster•5秒Semi
17 Nov 2017