{ SKIP }
文:MenClub John Chan  
POSTED ON 09 Oct 2017

Photos & Video: Heat Production

我相信,大部份試揸過本田(Honda)上代Civic Type R(FK2)同今代(FK8)嘅人,都會大致認同:FK2好辣好激好癲;FK8文明好多,易揸好多。 

呢類馬力300匹起錶嘅Turbo Hatch,有幾癲幾激,係理所當然,懸掛硬到你嘔白泡亦無可厚非,因為有啲車廠認為,辣嘢就係咁架喇。但係,呢類五門掀背車唔係只放喺trackday玩,理論同實際上都預咗用家「日日揸」,咁硬,點頂呀? 

講真,如果FK2嘅懸掛有comfort mode,世界肯定對佢又另一種評價。

試完FK8之後思考咗幾日,加上睇咗一啲資料同訪問,真係覺得FK2造得有啲急,有少少「趕住交功課」。 

但我覺得FK2有3樣嘢係幾「可愛」:外形,雖然呢個年代嘅Turbo Hatch,大大嚿,好難談得上動感或靚仔,但FK2硬係好似順眼過FK8,無得解,亦無須解。引擎,調校取向好清晰,要有自己風格,配備Turbo之後,仲係好有已往2公升自然吸氣VTEC引擎味道,整體運轉好順好輕快,中高轉好肯向上「飈」,儘管紅區起點喺7000rpm。FK2入彎好sharp,馬力雖有310匹,身型大咗咁多,仍然有高性能前驅車「車頭追住入彎」嘅優點,揸完之後,忍唔住講句,如果懸掛貼服啲,「冇咁跳」就好喇。

FK8外形並非本文討論重點,如果你話過佢似「掃把佬」,我希望你係「真心認同」,而唔係人講你又講。

企喺車頭睇,FK8唔算大部,個人認為佢都算幾惡嘅。

企喺車尾望,真係有啲論盡,車身好似幾長,如果唔係有隻咁大,線條咁誇張嘅擾流尾翼一早鎖住你焦點,第一眼望埋去已認定佢係一部中型fastback五門車。

FK8有三個行車模式,Comfort、Sport同「+R」,一著車預設係Sport,一如FK2,懸掛硬度、動力輔助多少同油門反應冇得獨立選配,喺今日嚟講,唔係個個接受到咁嘅「科技水平」,傳聞FK8喺進入生產期後半段,上述三方面都有得Mix & Match,等定唔等,你自己諗。

喺九龍灣、龍翔/呈祥道一帶,用Sport模式揸咗一段時間,比我想像中嘅貼服好多,即使硬,都冇FK2已往嗰種硬繃繃,喺黃大仙中心、永光書院、豐力樓、畢架山花園、大埔道交匯處一帶嘅混凝土路面,車頭好安穩。另外,後懸自身嘅震盪同運作噪音未有大幅度傳上車廂,尾輪亦好貼地,呢樣係值得拍多兩吓手掌。停車後無意中發現,後輪輪拱有一層表面狀似「絨毛布」嘅物料,相信有助抑制傳入車廂嘅胎噪。

轉去「+R」,行經鋪裝得好嘅柏油路,例如汀九段、青龍頭段、沙倉段青山公路,又或是北大嶼山高速公路,懸掛雖然硬咗好多,但仲保留住一丁點韌度,而呢一丁點韌度,正好喺駛過駁口位或渠蓋位時起咗緩衝作用,唔係話令你舒服到震,而係不致於令部車同你一齊「硬食」,愈揸愈辛苦。

呢個狀態下嘅軚盤算係重,咁梗係啦,北大嶼山高速上限係110km/h,幾乎全部大直路,但我咁諗,如果喺trackday,你高速「嚿幾、兩嚿」喺賽道左片右片,呢個轉向力度/「重量」相信會啱啱好,出入彎都有信心好多。

引擎反應比起comfort模式sharp好多好多,但感覺上同記憶所及,仍未及FK2嘅「+R」辛辣同急激,咁係好定唔好?我毫無疑問投向FK8嘅設定,儘管FK2「+R」模式殺氣騰騰,一大浸血腥味,但懸掛咁跳,想企穩啲揸定把刀絕非易事。

Comfort模式,懸掛的確係「舒服好多喇」,再具體啲,就係柔韌咗,要留意柔韌比重大概係3對7,喺舊山路輾過老化同起伏嘅柏油路面,仍然有少少彈跳。

轉向、引擎,以至成部車嘅操作節奏都輕鬆得多,呢一刻嘅FK8絕對係一部sporty嘅家庭買餸車,但要批評嘅係:後排座椅嘅背墊同座墊嘅承托力只屬一般,有啲

似坐喺Lancer Evolution RS喺後座,希望本田只係想籍此偷輕整體車重,唔係因為「孤寒兼慳皮」。

操控方面,FK8動態好平衡,與FK2「追住彎心殺入去」嘅取向明顯有別。可能係懸掛、轉向,以至其他機械細節嘅調校所致,FK8喺急速制動後扭軚入彎,總係畀你一種「車頭輕巧過FK2」嘅良好感覺。另外,喺全新懸掛格局之下,我總覺得後輪同前方驅動車輪合拍咗好多,唔單止係循跡咁簡單,喺窄啲嘅彎路,尾轆總係好肯追隨前輪嘅指向,並且加以配合。

即使FK8係一部咁大馬力嘅前驅車,兼且冇四輪驅動,亦冇最新嘅torque vectoring或四輪轉向,但硬係覺得佢跑彎就係好靈活,轉向好準兼好輕鬆,而且駕駛者係隱隱感受到各個系統緊湊配合,你話軚感可以豐富啲就好喇。

本田將Civic Type R造大,變成300匹級數嘅高性能Turbo Hatch,我真係有擔心過,CTR日後難免被「大氣候」牽住走,下一代會唔會有dual clutch自動波或增配四輪驅動?

呢啲唔係「諗得太多」,事實亦無得你驚,有辦你睇,NSX可以都變成配Hybrid、Twin Turbo引擎兼只得自動波。

「喂!阿John,NSX還NSX;Civic還Civic,兩回事嚟嘅!」

我都希望係咁。

Honda Civic Type R(FK8)規格

售價:約59萬元(2018年車)

代理:Reliance Motors www.honda.com.hk

車型:五門四座

體積:(長)4560mm x (闊 )1875mm x (高)1435mm

軸距:2700mm

引擎形式:1996c.c. 直列4汽缸,缸內直噴,前置引擎

馬力:310匹/6500rpm(使用95辛烷值電油);320匹/6500rpm(使用97辛烷值電油)

扭力:40.8kgm/2500-4500rpm

波箱:6前速手動,前輪驅動

懸掛:(前)麥花臣支柱;(後)多連桿

車重:1387kg

0至100km/h加速:5.7秒

極速(km/h):270km/h

耗油:8.8L/100km 

輪胎:Continental Sport Contact 6 245/30 R20

收埋自己靜靜哋玩嘅好車,真係唔使咁大部,唔好太搶眼、太靚仔;座位……兩個就夠;Turbo呢?大c.c. N.A.偈已不錯;馬力,三百零匹乜都夠晒皮。
auto
【無需要太多】BMW Z4 M Coupe(2008)
20 Oct 2017
三菱汽車(Mitsubishi Motors)未來三年將有11款型號轉款,當中一款要全面大轉款嘅係車齡有10年嘅Delica D:5
auto
【實牙實齒】三菱汽車社長:新Delica D:5三年內登場
19 Oct 2017