{ SKIP }
文:MenClub John Chan  
POSTED ON 20 Oct 2017

Z4 M Coupe總產量相當少,只有約4900部,右軚版更只有約1050部。 

以一款賣咗三個年度嘅跑車而言,其實唔算成功,除非你係忠實M系列fans,又或長年留意德國車動態,否則,我相信大部份人對Z4 M Coupe都係「冇乜印象」。 

正如我喺短片中提到,嗰一期(即約2002至2006年),大多數買德國雙座位跑車/雙座位開篷跑車(Roadster)嘅人,焦點都幾乎聚晒喺保時捷(Porsche)Boxster、Cayman又或平治(Mercedes-Benz)SLK。

唔係話寶馬(BMW)第一代Z4冇人要,而係當時由Chris Bangle設計嘅外形,確實太有性格,Like嘅,會即刻俾錢;唔Like嘅,望多眼都唔想。 

寶馬Z4當時嘅處境,換轉喺保時捷同平治,極可能係大災難。好在,第一代Z4嘅操控係相當好,非常之好玩。我仲記得Z4 Roadster抵港冇幾耐,當時我喺《車主》雜誌做咗約兩年多,寫文同試車都仲好生手。總編輯曾東帆先生,叫我跟「師兄」羅文傑去試Z4 Roadster 2.5 6AT,攞多啲經驗……

我仲好記得當時嘅Z4 Roadster 2.5係相當快嘅一部車,即使數年後,先後借來朋友及讀者嘅2.5或3.0版本再揸,依然覺得好快好爽。當然,望下速度錶同撳錶計時發現,其實「唔係咁快啫」,但Z4就係有本事營造到呢種「好快呀喂」嘅感覺,兼且如幻似真。喺加速、軚盤、入彎積極性、引擎聲呢幾方面都好吸引;3.0版本更加係「十分刺激」,喺屯門公路遊走,真係不禁問一句:「可唔可以熄一熄啲快相機?」

同期嘅Boxster同SLK車系完全冇呢種魔力。

Z4 M Coupe嘅駕駛氣氛明顯比Z4 Roadster緊張得多,車廂亦不算大,坐入去,你自知將會好好「炮製」呢部辣車。

呢部Z4 M Coupe屬最後期嘅一批,2008年製造,當年以新車型式輸往日本,到而家為止累計行駛咗約32000km。座椅好新淨、按掣、旋扭,波棍、扭動軚盤反應嘅緊緻而順滑,引擎亦好順滑,揸落似一部只係兩年左右嘅跑車。

我喺2013年初,喺英國揸過一部Z4 M Coupe,我仲好記得佢係配Run-flat胎,喺英國嘅B road揸,部車總係彈吓彈吓,再加上Z4 M Coupe嘅懸掛比其他Z4車系成員硬,例如轉用較硬嘅彈簧、更粗壯嘅防傾桿等,所以即使引擎好爽好順亦好大力,但總係無法長時間用盡佢。

今次呢部配Michelin Pilot Sport車胎,雖然已使用咗一段時間,但早段緩震表現仍算唔錯,無論喺慢速或高速輾過渠蓋或公路駁口,再冇明顯或令人不安嘅彈跳,當然,亦同部車低咪,懸掛仲好新淨有關。

購買Z4 M Coupe要注意嘅事項,其實唔算好多。

揸去升高部車睇吓有冇唔正常接駁,或碰撞修補呢啲唔多講。 

嘗試向賣方索取資料(例如汽車手冊),了解首任車主喺行咗頭2000km,有冇返過代理更換機油,因為新車出廠時所注入嘅機油屬run-in規格;必須喺首2000km更換,並轉用一般規格機油,否則會令引擎部件有不正常磨蝕。

O2感應器係常壞項目,試車時不妨嘗試同賣方協商,揸遠少少(例如來回一轉屯門公路嘅路程),因為有故障(著燈)嘅O2感應器,喺reset後嘅20km/h內都唔會再著燈,行遠啲,自然容易check到有冇事。

有啲玩家以為E46型M3嘅O2感應器都適合E86型Z4 M Coupe使用(以為佢哋都係3.2公升直六寶馬偈嘛),殊不知E86嘅直六機器已採用新版本32 bit西門子電腦,並改用特製嘅O2感應器。買咗畀E46 M3用嘅,試都唔使試,因為插座完全唔同,想「拮」都「拮」唔入。O2感應器有兩粒,要換就一次過兩粒,每粒約二千餘港元。

有部份用家表示,後懸彈簧喺40000萬多公里會折斷。上車前留意吓前後離地距及車輪與輪拱之間嘅空間,有冇明顯差別,過彎時車尾有冇不規則嘅怪響。英國有用家趁機更換Eibach嘅出品。

留意引擎艙火擋與塔頂嘅兩枝塔頂桿,兩枝桿與塔頂之間,有一個金屬鞍座,呢個鞍座同塔頂焊死,但有唔少海外用家都發現,好多有「激劈」過(例如成日去trackday)嘅放盤,呢個鞍座都好易出現裂紋。零件唔係貴,但維修手工貴,亦好花時,埋單肯定係一條大數。

Z4 M Coupe係我試車生涯中,其中一部好喜歡嘅跑車。佢推出時覺得佢好醜樣,冇乜留意,到佢停產嗰陣先知係好嘢,到今時今日,我鍾意佢多過E46 M3 Coupe (6MT)。

收埋自己靜靜哋玩嘅好車,真係唔使咁大部,唔好太搶眼、太靚仔;座位……兩個就夠;Turbo呢?大c.c. N.A.偈已不錯;馬力,三百零匹乜都夠晒皮。

BMW Z4 M Coupe(2008)規格

車型:三門兩座

體積:(長)4090mm x (闊 )1780mm x (高)1285mm

軸距:2495mm

引擎形式:3246c.c. 直列6汽缸,自然吸氣,前置引擎

馬力:343匹/7900rpm

扭力:37.2kgm/4900rpm

波箱:6前速手動,後輪驅動

懸掛:(前)麥花臣支柱;(後)多連桿

車重:1495kg

0至100km/h加速:5秒

極速(km/h):250km/h

輪胎:225/45 ZR18(前)255/40 ZR18(後)

法拉利用來取代California T的Portofino開篷超跑GT已經正式登陸中國市場,並於日前在南沙港舉行盛大登場儀式。
auto
法拉利Portofino正式登陸中國市場
23 Nov 2017
一個男人成功「荼毒」老婆嘅感人故事!
auto
得一知己死而無憾 沖繩飄移夫婦
23 Nov 2017