{ SKIP }
文:MenClub John Chan  
POSTED ON 07 Jan 2017

Photos & Video: Suzuki Production

Special Thanks: Honda's Button/Macao Yellow

九十年代中晚期,即是突然有好多水貨本田(Honda)Integra Type R喺香港馬路出現嘅日子,嗰時未有咩「天眼」、主流嘅手提電話仲未有得影相,印象中,夜晚喺公路遇到飛車情況遠比而家多、比而家「激」好多。
嗰時成日有人話,話俗稱「四窿R」嘅Integra Type R(96 Spec R)好輕易追到、甚至快過三菱Lancer Evolution IV、V、VI代。



當時我冇認真深究,聽完心諗:「得唔得呀?係唔係揸Type R嗰個係老手,揸『路筍』嗰個係新牌仔咋!有冇讓賽先?」轉吓眼已經2017,呢部96年製造嘅Type R已經夠晒資格以老爺車形式喺香港登記出牌。
個人觀察,近四、五年香港多咗外形企理嘅DC2型Integra Type R(以下簡稱DC2R),部份用番原裝Specs胎軨,有啲會有少少改裝,死氣喉亦都唔算粗。究竟有冇大撞過駁番十九幾次唔係重點,最開心係見到呢啲DC2R車主幾錫部車,有時見佢哋都係遊吓車河心態,揸得唔算快……




講真,DC2R喺馬路最「風光」嘅日子一早過晒,長江後浪推前浪,任你點改,試問又點可能快得過新車!難得部車底盤企理冇撞,「波dee」冇生銹,真係應該好好珍惜,畀呢款Honda經典「頤養天年」。


DC2R分前後兩期,分別係早期嘅96 Spec R及後期嘅98 Spec R,兩者先後喺1995年8月24日及1998年1月29日發表,由於96 Spec R所配嘅15吋輪圈有4個螺絲孔,而98 Spec R所配嘅16吋輪圈則升級至5孔設計,因而有人將兩期DC2R稱為「四窿R」同「五窿R」。


好多人問96 Spec R定98 Spec R好?我即時諗起另一條問題:「AP1 S2000好,抑或AP2 S2000好?」我覺得:「Honda高性能車邊會『揸流攤』㗎,前後期都係好車!」咁答係世界仔咗啲,但個人口味我仍然係撐前期製作,因為前期型最能保留整個project嘅設計原意、最有「Lab味」、部份製作亦都較認真,儘管後期型有大量改良升級,易駕程度高咗好多,但我仍然揀96 Spec R同AP1 S2000。


DC2R好玩要點之一係車輕,只重1060kg,輕嘅車永遠都咁抵錫,引擎又大力,1.8公升嘅B18C型直四自然吸氣引擎,壓縮比11.1:1,最大馬力200匹/8000rpm,峰值扭力18.5kgm/7800rpm,除開每公升輸出111匹馬力,淨係呢個咁勁嘅紀錄已經要Keep好呢款車。


一如好多高轉型嘅直四VTEC引擎,平常兩千零轉慢揸力度偏柔,俗啲講「真係削咗啲」,就好似揸緊老豆部點都唔肯賣嘅原裝「EG 1.5 Civic」,咁囉!不過,呢副喺96 Spec R嘅B18C運轉好暢順,好爽,完全唔似已經有20歲。篤腳大油,轉數升到5500rpm左右,定住先,Feel吓實時嘅運轉質感,好結實,聲好靚。聽夠啦嘛,再篤深油門,轉數一下子衝過6000rpm,直撲7000rpm,再急衝至8000rpm,爆Tec嘅時間好短,但好精彩,好震撼,感覺就似大肶夾住碌火箭咁,我曾經親耳聽過一位本田工程師咁樣形容「爆Tec」:「就好似櫻花盛開咁燦爛。」


坊間多年來流傳早期嘅DC2R「造一部、蝕一部」,因為引擎嘅進排氣孔都以人手打磨,花時間,產量低,產量每日25部……我冇實質數字,亦唔係本田「掌櫃」,唔敢話廠方係唔係「蝕住造」,但B18C嘅製作確實好認真。例如鈦金屬活塞連桿、超硬凸輪軸、活瓣,整個引擎曲軸表面有一層油膜,令機油黏附喺曲軸嘅磨擦位,做到經常處於最佳潤滑狀態,又可以變相縮小機油油池容積,乘機減磅,呢啲咁講求高水平機械設計同冶金工藝嘅製作,一聽就feel到本田嗰份熱血同執著。




96 Spec R嘅五前速手動波箱,一至五波算幾緊密,尾牙4.4;98 Spec R仍採用與96 Spec R相同比率嘅一、二、三波,但四、五波稍為降低,尾牙則加大到4.78。以約100km/h行車,引擎轉數約3000rpm,用今日嘅標準,你會心郁郁想問:「可唔可以加個6波?」



我好鍾意前期DC2R嘅彎路表現,完全唔多似揸緊前驅車,喺鋪裝質素高嘅柏油路快劈,扭軚入彎話入就入,幾快佢都奉陪,能夠有咁上下水平嘅turn-in反應嘅其他例子,我暫時只數到Mk5 Golf GTI。可能因為前期嘅DC2R好肯入彎,令人不自覺會愈揸愈快,劈彎劈得愈嚟愈狼死,好易劈到後輪抓著力驟然下降,咁點呀?甩尾囉!


幾年前喺日本曾揸過朋友嘅前期DC2R同DB8R,嗰次喺山路快劈嘅甩尾嚟得唔算突然,因為自己都知已超過咗極限,冇乜刻意去救車,只係好自然咁鬆咗少少油門同少少反軚。我知有唔少玩家當佢係可以甩尾嘅頭轆車去玩,但咁樣嘅風險都幾高,如果「撈唔番」「撈唔切」,一係「推爆」,一係「喪甩」,唔抵囉!



唔少人以為DC2R做咗好多補強,例如前懸塔頂、後懸底部同尾廂後緣都有金屬橫撐,兼且系出Type R,一定好實淨啦。但我覺得佢依然係單薄咗啲,唔好講同歐洲車比咁脫離現實吖,就算同遲佢幾年面世嘅EK9 Type R比較都差幾皮。講到尾,都係最老土嗰兩個字:謹慎!




短片中提過部份入購DC2R嘅注意事項,呢度仲有少少補充。


1. 波箱鞍座吊碼容易損壞,畢竟經常在高轉下運作,壽命難免相對地短,試駕時要留意有冇不正怪響或震盪


2. 原裝避震機壽命約9萬公里,如果經常用來快跑或「擺多過揸」,其實係時候換


3. Cam帶最好每60000km換一次


4. 有資深用家建議最好用番本田品牌嘅波箱油同機油,但喺香港好似唔係咁易買到喎,唔緊要,揀黏度係5W40,大稀嘅話,高轉就發揮唔到保護作用


5. 本地有少量保養恰宜嘅DC2R,但放盤量少,日本仍可買到唔少優質中古盤,而且定期返當地本田認證嘅維修中心更換零件及保養,但最緊要搵到有信譽嘅中介人幫你打點。


6. 優質嘅日本中古盤,以96年嘅DC2R為例,車價連抵港手續及費用,約由18至19萬元。


7. 循例講講保險行情,據用家表示,要搵到有信譽嘅保險公司受保,投保人必須有60個NCB,年齡最好喺35歲或以上,持有車牌至少十年,三保保費大約係$2800至$3200。



意大利車廠Fiat早幾年出咗部「好打意」嘅Fiat 500,但唔知點解之後出嗰啲車都個樣都好……平凡。直到近日公佈嘅新版124 Spider,終於都算似返啲樣啦!呢部2017年版Fiat 124 Spider同Mazda 嘅MX-5 Miata係用同一個車 ...
auto
日意混血 Fiat 124 Spider
20 Nov 2015
A Class facelift 引擎規格與舊有型號基本上一樣,作小量調校。車身呎碼亦沒有大改變,只是細節上有點修改。當中A45 AMG較為顯著的改變為0-100公里加速比之前快0.4秒,只需4.2秒,增幅相當大。除此以外,與AMG GT及C ...
auto
Mecedes-Benz A Class小改款
17 Nov 2015