Photos & Videos: Citroen France

法國新任總統馬克龍（Emmanuel Macron）周日喺巴黎巡遊，佢嘅總統座駕DS 7 Crossback喺當日活動嘅焦點之一。

相比前幾任法國總統座駕，例如希拉克（Jacques Chirac）嘅雷諾（Renault）Safrane同Vel Satis、薩爾科齊嘅雪鐵龍（Citroen）C6同標致（Peugeot）607 Paladine，上一任法國總統奧朗德（Nicolas Holland）同馬克龍都唔再以傳統豪華房車作為總統座駕。

希拉克喺1995年就職時乘坐嘅Citroen DS 21開篷車

戴高樂（Charles de Gaulle）喺1960年（上圖）

及1963年（下圖）使用嘅Citroen DS房車

咁嘅轉變好大程度上同法國三間大車廠，近年喺豪華房車巿場出現真空有關，因為607、C6已經停產多時，雷諾自Vel Satis停產後亦冇再涉足行政級房車巿場，「冇得好揀」係事實，貴為法國總統，冇可能要捱坐舊款車啩？

近年雪鐵龍（Citroen）旗下嘅高級汽車子品牌DS，喺法國本土同少部份歐洲國家做得幾好，DS冇搞豪華房車，反而集中火力將掀背車、SUV造得更高級更精緻。

奧朗德（Nicolas Holland）就以五門高級掀背車DS 5做總統座駕，不過有人抽水話，奧朗德「細粒」，DS 5細細部，啱佢老哥㗎喇。

馬克龍（Emmanuel Macron）今次選用嘅DS7 Crossback係DS品牌嘅旗艦，屬於高級SUV，喺今年初發表。車長約4.6米，闊約1.9米，尺碼比4.63米嘅奧迪（Audi）Q5細少少，據知日後定價亦同Q5差唔多，部份引擎容積細啲嘅DS7 Crossback，售價同部份Q3相近。

民用版DS 7 Crossback有三款電油引擎，包括1.2公升、1.6公升及大輸出1.6公升引擎，全部配Turbo，最大馬力分別為130匹、180匹及225匹；另有兩款柴油引擎，1.5公升130匹，2.0公升180匹。

Sorry，數漏咗Hybrid版，有機會遲啲去法國旅行，租部試吓囉，最新嘅法國車，其實都幾好揸好坐㗎。

波箱方面有6速棍波及8速自動波。

至於馬克龍嘅DS 7 Crossback機械規格，梗係唔會公布啦傻豬，唔通講埋用咩防爆防彈裝置咩！

不過，DS品牌都公布咗「總統號」嘅製作過程，例如車身同內裝，多處都鋪上金箔，例如合金輪圈嘅中央蓋、倒後鏡殼、中控台飾作等等，講真，Show到內櫳畀外界睇都算係咁（當然，你可以話show畀你拍片嗰部，唔等如總統坐嗰部）