Photos: 新明和工業

除非全年揸車都開住冷氣，否則喺冬天開窗揸車，又或揸開篷車，更可能係車廂氣閘開始鬆脫，跟著部垃圾車呢……聞一聞，當堂醒晒。 

喺日本擁有垃圾車最高巿場佔有率嘅新明和工業，聯同其他三間公司，宣布喺下星期於東京舉行嘅「2017 NEW環境展」，發表「垃圾車除臭噴霧」，產品將於6月正式發售。

「2017 NEW 環境展」喺亞洲區同類展覽中最大規模

呢種噴霧嘅核心技術唔算好複雜，都係將多種香味材料混合一齊，但點混合呢，梗係商業秘密啦，但有關方面都概略簡介，就係參照香水調配方法，喺眾多香味材料之中，混入一小部份人類認為難聞嘅氣味，嘩！聽落要好高道行先mix得到喎。

研製香味材料嘅兩間公司，敷紡（Shikibo）同山本香料早喺2011年已製作除臭配方，定名為「Deomagic」，但一直未有大作為，直至凸版印刷（Toppan）加入之後，呢種除臭技術先得以被探索如何廣泛應用。據講「Deomagic」味道同果味相似，咁fresh牙？要唔要加啲沙律醬？

新明和工業將「Deomagic」，配合噴灑系統，應用喺垃圾車。呢套噴射系統可以喺清潔公司新購入車輛時加裝，又或後加都得。成套系統135,000日圓（即約9200港元），每桶（17kg）「Deomagic」除臭劑嘅售價為38,000日圓（即約2600港元），每桶可以稀釋20份，足夠畀每部車補充80次。

手提裝容量480ml，690日圓（約47港元），唔知遲啲Tokyu Hands有冇得賣？

新明和工業話做過測試，有91%受訪者表示，「Deomagic」有效除臭，咁咪幾好囉，希望呢款除臭劑唔會損害環境啦。我唔敢諗香港有冇公司引入呀，你知啦，羊毛出在羊身上。