Photos: Audi Press

好地地有四汽缸、六汽缸唔用，點解走去搞副五汽缸引擎出嚟？

你有所不知，家家有本難唸的經，有得揀，我仲識你教咩！ 

直列五汽缸引擎，喺車壇有四十多年歷史，最先見於平治（Mercedes-Benz）W123型柴油引擎版E-Class（當年仍未有此稱號），喺相近時間，奧迪亦推出首台「直五」，2.1公升，屬電油版本。

呢兩款引擎背後嘅設計者，係曾經權傾歐洲汽車界嘅福士集團前主席皮希（Ferdinand Piech）。 

七十年代中嘅奧迪，積極發展前置引擎前驅車系，亦銳意進軍中型中產房車巿場，有感當時四汽缸引擎馬力不足，扭力帶唔夠闊，六汽缸引擎又大又重，令走彎表現更笨重，大大削弱濕路或雪地行車時嘅循跡力，事實上，亦難以配合前置引擎前驅佈局。

奧迪最終喺現有四汽缸引擎為發展藍本，增加多一個汽缸。

1980年發售嘅Audi Quattro配直5 Turbo引擎 

80年代奧迪直5引擎剖視圖

80年代最頂級嘅奧迪WRC越野賽車（上圖）都配搭直5引擎（見下圖）

快速搜畫直五引擎喺奧迪嘅發展，八十年代直五奧迪賽車喺世界越野錦標賽（WRC）、北美Trans-AM叱吒一時，亦喺奧迪首部高性能旅行車RS 2 Avant嘅心臟動力格局，但自九十年代中退下火線。

Audi RS 2 Avant

究其原因，當中涉及當時直五引擎重量偏高（鐵鑄汽缸體），先天點火次序間距欠平衡，直接增加引擎運轉時震盪，部份組件設計亦以過時（沿自七十年代）。但直五「唔多唔少，啱啱好」嘅數目，喺2007年左右又被睇中，發展成為2009年TT RS嘅引擎，不過，喺闊別車壇十多年後，多咗好多新技術，例如鋁合金曲軸、缸內直噴燃油供應系統等等，再加上新一代渦輪增壓器，令奧迪新一代直五引擎有刮目相看嘅表現。

2009年版TT RS

出戰紐布靈24小時賽嘅TT RS賽車

喺缸內直噴燃油供應系統配合下，直5引擎低轉扭力更佳更肥厚

去年發表嘅400匹最新TT RS，依然採用直五Turbo引擎，最大馬力升至400匹/5850rpm，峰值扭力達48.9kgm/1700rpm-5800rpm。最新版本嘅2.5公升直五TFSI引擎，改用鋁合金代替鑄鐵製作曲軸箱，引擎底部嘅潤滑油池亦以輕巧嘅鎂合金製造，加埋鋁製油泵，整副引擎重量大減26kg，足足5包袋裝食米嘅重量有多，仲要係放喺車頭，而家冇咗呢26kg「肥肉」，新TT RS嘅入彎反應應該更加好啦啦！

最新TT RS

RS 3 Sportback