Photos: Toyota Japan

豐田昨晚喺其日本網站，公布第8代Camry日本版嘅圖片及簡短資料。 

來自日本傳媒消息，日本將於7月上旬（有說係7月11日星期二）發表第8代Camry。

新Camry外形與年初喺美國發表嘅大致相同，冇晒以前「乖乖仔」味道，潮咗型仔咗，鬼面罩造型與近年嘅Corolla相似，但泵把對落嘅氣壩相當之大，望真有啲似鯨魚嘅「下巴」。

大部份報道指，日本版Camry唔會有3.5公升V6引擎，發表時只會有178匹2.5公升直四自然吸氣引擎（配8前速自動波箱）及2.5公升直四引擎加Hybrid混合動力系統（配無段變速自動波箱），另有報道提及，第8代Camry喺發表後第2個年度嘅首次facelift，將會引入2公升Turbo引擎及8前速自動波箱。

豐田喺昨晚發放嘅相片中，同時公布TRD版Camry同Modellista版Camry，套包圍套輪圈都好掂喎。講返兩句公道話，新一代Camry個樣惡咗唔少，後生咗好多，但吸唔吸到後生嘅日本前驅中型房車客仍係未知數，喂！你睇日本同香港，好多人用緊Mazda6㗎。