去年電動方程式香港分站，本地車迷相信見過呢張呢部有Audi廠徽嘅電動方程式賽車。 

聽過部份車迷以為呢支名為Team ABT Schaeffler Audi Sport嘅車隊，就係「奧迪廠隊」。啱咗一半啦，雖然奧迪為ABT提供咗好多技術（當然有錢啦），但車隊嘅運作同管理，仍然獨立於奧迪。

但係，自從奧迪話退出世界耐力錦標賽（WEC），唔再同保時捷919 Hybrid及豐田TS050一齊鬥。奧迪已放咗聲氣話會將全部喺賽車方面嘅精力，擺晒落電動方程式（Formula E），事實上，廠方已講明2020年之前，將有3款電動車推出，照咁睇，買重注落Formula E都合理嘅。 

廠方啱啱宣布，正式接管Team ABT Schaeffler Audi Sport，易名為Team Audi Sport ABT Schaeffler，即係將Audi Sport放喺前面，ABT放後，動作簡單，意思顯而易見。呢支「廠隊」最快將於來年賽季正式上陣。