Photos & Videos: Audi

奧迪（Audi）啱啱係巴塞隆拿公布第4代A8，新A8有好多新gadget，相信係有史以來最先進嘅Audi。 

數齊咁多樣新設計就唔會嘞，畢竟唔係每一樣都可以嚟到香港，率先同你睇睇幾項最基本配搭。

電油引擎方面，Audi緊跟同級車玩法，以3公升引擎做起點，有兩個選擇。純電油引擎版，3公升V6 Turbo，最大馬力340匹。

另一選擇都係建基於上述嘅3公升V6 Turbo引擎，再配搭電動摩打，整個混合動力系統輸出達450匹。呢個級別稱為A8 L e-tron，屬於Plug-in式Hybrid車，用家可以選擇以傳統電線或無線系統為電池充電，系統可於2小時左右充滿8成電。不過，A8 L e-tron嘅純電動行車模式續行距離唔算長，只有50km。 

上述兩個級別都配8前速自動波箱。

新A8繼續以輕鋁合金製造，前懸雙搖臂，後懸五連桿，標準配備氣壓懸掛，四段高度調校。買家亦可以選擇主動懸掛，系統類似平治嘅Magic Body Control，A8嘅「大銀幕」設有掃描裝置，探測前方路面路況（每秒18次），從而立即改變懸掛硬度。

新A8亦有四輪轉向系統，咁第時泊香港嘅室內停車場，應該更容易啦。

頂級版方面，將配6公升W12引擎，最大馬力約594匹。另外，盛傳新S8將配4公升Twin Turbo V8引擎，馬力將不少於550匹。 

3公升V6 Turbo A8幾吸引，外形比上代年青，亦冇咁大份，「瀟灑」咗，如果真係要買大車，值得考慮。