Photos: Mazda

萬事得今早（25日）發表咗一張CX-8車身側面圖片。

叫得CX，都係走SUV路線，不過廠方就話CX-8係Crossover SUV，呢個term唔陌生，但睇樣去詮釋就由你自由發揮。

見到個8字，又係配三排座椅，的確令人想到：係唔係以CX-8接替「年事已高」嘅MPV車系 Mazda8。

CX-8車長4.9米，大房車咁嘅長度，高1.73米，拍得住豪華van。有6座同7座位版本。

現階段公布嘅引擎同波箱規格只有一種，就係2.2公升柴油引擎同6前速自動波箱，相信係針對國內本土巿場。

Mazda8「年事已高」，加上日本中大型MPV巿場前景唔明朗，以SUV入替都好合理

後門都幾大隻，相信可以有助第三排乘客上落

會唔會有電油引擎呢？點可以冇呀，有北美傳媒報道指，電油版將配CX-9所採用嘅2.5公升直四Turbo直噴引擎（見下圖），最大馬力250匹，峰值扭力42.8kgm。

呢款引擎配全新進氣管道佈局，慳油程度遠勝已往嘅2.3公升直四Turbo直噴機器（即Mazda6 MPS動力心臟），不過，都要睇吓CX-8配幾多段速嘅自動波箱。

廠方話CX-8喺今年年中發售，喂！仲有幾日就8月，年中凸咗好耐喇，咁即係「隨時出閘」？