Photos: Infiniti

近十年歐洲、美國同英國嘅經典車節愈來愈熱鬧，每年八月下旬，又係美國加州圓石灘（Pebble Beach）經典汽車節舉行時份。一如已往，重視北美高級汽車巿場嘅品牌，都會趁機發表概念型號或生產型新車。

Infiniti Prototype 9，一望就好似1930年代Mercedes-Benz 「銀箭」（Silver Arrows）或Auto Union V型16汽缸（係，真係V16）賽車。要講認真，嗰個年代，Infiniti嘅母公司日產，先至推出汽車冇幾耐，大纜都扯唔理同呢類當時地上最強汽車有關係。有時呢，對概念車又唔使咁認真嘅，啱睇，睇得舒服就得啦。

四個轆一個座位位，鬼面罩幾似鯨鯊咀型，既有歐洲30年代賽車味道，又有少少hot rod汽車feel。據悉，動力系統來自新一代Leaf，但為配合Prototype 9只有890 kg重嘅車身，動力輸出已調低，驅動後輪嘅摩打最大馬力150匹，峰值扭力32.6kgm，0至96km/h加速約5.5秒，極速可達210km/h，但為保護駕駛者，極速已鎖定喺160km/h。

咁嚿電夠行幾遠呢，聞說可以夠喺賽道激劈20分鐘……果然只係一部Concept Car。