Photos: Alcraft U.K.

今年先後介紹過幾款英國嘅高性能電動車新project，有啲埋向投產，有啲仍處於設計階段，呢類project無論喺動力佈局設計同最大馬力輸出方面都幾有睇頭。英國有好多汽車機械工程公司，規模未必好大，但人材質素、經驗同技術都係世界前列，搞呢類產量唔高嘅高端project，駕輕就熟。 

Alcraft係全新嘅汽車公司，班底都係來自英國汽車業嘅行政及科研人員。

Alcraft GT屬於2+2座位Shooting Brake格局，全電動，現階段仍處於模型設計階段，預計2019年投產。Alcraft GT計劃配3個電動摩打，最大馬力可達600匹，峰值扭力111kgm，四輪驅動，0至100km/h加速約為3.5秒，續航距離約為480km，可以配置增程器（Range Extender），為電池充電。

現階段嘅設計模型，只係實物體積嘅三分一，但望落已幾吸引，尤其係車尾嘅Shooting Brake車身線條，令人霎時聯想到Range Rover Evoque同一啲七十年代嘅歐洲fastback 2+2跑車。

70年代至80年代中，英國有唔少低產量嘅Shooting Brake，主要從現成嘅積架或Aston Martin改裝而成，呢啲車方便用家到偏遠地區打獵或遠遊。打獵呢樣嘢，梗係有啲電油味加火藥味先過癮嘅，充完電揸到老遠去打打殺殺，好似唔多啱feel，haha。