Photos: Porsche

MenClub約喺一年前，介紹一款1:4保時捷（Porsche）水平對向六汽缸引擎模型，當時大家反應好踴躍，有MenClub讀者更立即上網訂購，趕喺去年聖誔前有得玩。

呢款由德國出版社Franzis Verlag發行嘅911氣冷引擎模型，推出後冇幾耐就喺歐洲同美國有得賣，亦係保時捷博物館精品店嘅「長期銷量王」，畢竟$1600左右就買到副，郁得、砌得（摩打推動）、有引擎聲，又識發光嘅引擎模型，確實非常有吸引力。

Frank Wessel將引擎模型轉速提升至3000rpm

呢款引擎能夠咁受歡迎，同佢唔使用膠水、只用螺絲、易砌（兩小時左右，約290個組件）好有關。一如其他各種模型，總有fans唔滿足於原裝specs，會落手改裝同升級，其中52歲嘅資深模型友Frank Wessel就將引擎模型轉速提升至3000rpm。

「喂！咁高轉，副模型偈頂唔頂得順架？」放心喎，Frank係改裝模型高手，又有自己嘅模型製作室同改裝工場，佢安裝咗特製嘅金屬啤令（Bearing），令到引擎曲軸運轉暢順，兼且唔會令零部件之間產生磨蝕。

喜歡將模型「舊化」嘅fans，落足心機同「手力」

另有fans喜歡為模型「舊化」，例如令排氣喉有銹蝕效果，大大增添經典911氣冷引擎嘅古舊味道，方法係將顏料塗在零部件，再用畫筆同松樹油脂抹擦，令顏料藏入部件表面嘅凹痕，呢個工序有時要持續幾小時，真係手都軟埋呢！

1:3 547型水平對向引擎模型，係Franzis Verlag出版社與保時捷車廠聯手合作嘅第二浪產品

Franzis Verlag出版社最初構思推出911氣冷引擎嘅時候，原意好簡單，就係想為廣大讀者提供一套展示引擎基本運作原理嘅科學模型，唔係要刻意懷古，所以開發團隊手上並無真實版911氣冷引擎作參考。

後來出版社巿務部負責人Martin Koschewa聯絡保時捷博物館，希望可以將模型放在博物館商店發售，雙方由是不自覺打開合作對話匣子。

一通本來平平無奇嘅巿務推廣電話，開啟咗保時捷寶貴嘅資料庫，最終令引擎模型像真度大增

館方主管之一嘅Jörg Thilow為出版社提供咗大量設計圖，而保時捷經典車部（Porsche Classic）亦有參與計劃，有保時捷力撐，唔怪得副模型咁正啦。雙方現正有另一新計劃，將於2018年推出傳奇嘅547型1:3水平對向引擎，最吸引係連凸輪軸都郁得，問你怕未？