Photos & Video: Nissan U.K.

用搖控器控制一部真車嘅YouTube片，成日有得睇啦，冇特別。

但今次日產拍嘅呢條片，的確幾特別，要控制嘅，當然係旗艦跑車GT-R。 

控制呢部GT-R嘅，係Playstation GT Academy冠軍車手兼現任日產Nismo車手嘅Jann Mardenborough。雖然我真係唔熟佢嘅背境，但話晒係GT Academy嘅「冠軍車手」，又有真實落場經驗，「控車」技術一定有返咁上下。

今次佢就係用Playstation DualShock®4 controller控制部車，而且係坐喺直升機居高臨下，追住部車咁玩。先唔好講咁樣玩有幾好玩，淨係有過咁嘅體驗都夠講足一世。 

阿Jann喺英國銀石（Silverstone）跑道長2.6公里嘅路段，創出1分17秒47，平均車速達122km/h，最高時速達211km/h。能夠做到咁嘅表現，除咗要個人夠醒，部車都做咗好多改動，例如軚盤、波箱、制動及油門，各安裝咗4組機械人（Robot），車上安裝咗6部電腦，每秒可作出達100項嘅操作指令。

阿Jann手持嘅DualShock®4 controller會將控制信號先傳到一個微型電腦，然後轉化為joystick同一般按鍵信號，再傳送至GT-R嘅電腦。另外，同時有兩位控制人員，可以透過無線電控制GT-R，一旦發現車輛失控，可以啟動ABS系統及關掉引擎。 

玩還玩，唔好撞爛人哋個場呀，話晒GT-R係一部550匹「辣嘢」。