要勁慳油嘅電油Hybrid車，我諗你問10個9個都會話豐田Prius，新一代Prius就快喺香港推出，想知部車好唔好，睇實MenClub。

慳油就好似Keep Kit瘦身咁，有時真係幾無止境（希望你唔好搞到有厭食症變咗瘦骨仙）。豐田Prius嘅Plug-in Hybrid版創下嘅47.6km/L紀錄，似乎都未夠變態，同樣有製作Plug-in Hybrid電油私家車嘅寶馬（BMW），現正開發下一代3系，最近開發團隊就被狗仔隊影到喺北歐測試原型車。

圖為今代3系（F30型）嘅330e，設有Plug-in Hybrid功能

預計於2018年發表嘅第8代3系（代號G20），其Hybrid型號嘅角色將會愈來愈重，因為屆時嘅Hybrid系統，唔單止得一套，而係有兩套。分別係2公升直四Turbo Hybrid及3公升直六Turbo Hybrid。其中2公升直四Turbo Hybrid更具備PHV（即Plug-in Hybrid）功能，如果第時你只係買畀阿嫂，湊吓令郎令千金近距離番放學，屋企又攞到電，分分鐘個幾兩個禮拜都唔使入油。至於3公升直六Turbo Hybrid版，就唔會有PHV，機械結構詳情未明，只知汽油引擎部份會有全新設計元件。

Plug-in Hybrid電油車，優點在於驅動能源有選擇，公司附近有免費充電位，梗係唔好嘥啦！

好嘞！究竟會幾慳油呢？來自德國嘅消息指，廠方對下代3系Hybrid（2公升直四Turbo PHV版本）嘅耗油表現好有信心，更向要好嘅傳媒暗示，「50km/L（公路及巿區混合測計模式）」係「伊斯汁」，假設2018嘅香港油價都係同而家咁上下，除開每公里0.28元，頂吖！兩毫幾子一公里嘅3系，好變態啫，320d同Prius都要企埋一邊。

3系嘅柴油版本，已經得到香港用家認同與好評，倘若下代3系Plug-in Hybrid有更具競爭力嘅售價，唔難大賣

但係，香港冇咗「環保車稅」優惠，而呢類Plug-in Hybrid車嘅售價亦比一般電油引擎版貴，先唔講香港代理會唔會引入，就算最後引入，都好睇車價同你擁有部車嘅年期，否則，只會係慳油唔慳錢，埋單計數未必真係著數。

慳油，亦可以零廢排，兼且好好揸，操控好，又舒服嘅車，其實係有嘅！

上圖為今代3系（F30型）

不過呢，3系咁好揸，車又唔算太大部，有得Hybrid兼且Plug-in，成個package，依然係好先進吸引，身為Gadget L兼車迷，自然好想擁有。