Photos: John Chan/Nissan/Nismo

MenClub喺12月中去富士賽車場（Fuji Speedway）採訪NISMO Festival 2016，當日有大量經典日產賽車任睇，部份更可以試坐，同你揀咗啲好有代表性嘅逐架睇。

今年係日產應援團成立20周年

想睇勻晒咁多款日產經典賽車同日產精品攤位，天矇光到賽車場就差唔多。筆者喺早上六點由橫濱出發

富士賽車場建成啱啱半個世紀

PRINCE R380（Type A-I）（1966）

今次出展嘅經典賽車，歷史最遠可回數至出戰1966年日本格蘭披治大賽嘅R380（Type A-I）。九十年代嘅R390 Le Mans賽車你實聽過，但R3xx系列最早唔係出自日產，而係1966年合併入日產嘅太子（Prince）車廠，太子車廠規模唔大，但Skyline、Gloria都係誕生自太子。R380（Type A-I）係日本第一部原型賽車，底盤沿自英國百拉咸（Brabham）BT8賽車，而引擎就建基於Gloria房車嘅G7型單頂凸輪軸引擎，變成編號GR8嘅2公升直6自然吸氣引擎，喺50年前已經有雙頂凸輪軸同每汽缸4活瓣設計，最大馬力200匹/8400rpm，峰值扭力17.5kgm/6400rpm，前後均採用雙搖臂懸掛設計，車重僅為620kg。
呢款賽車喺合併入日產車廠前，以「Last Fight」姿態出戰1966年第三屆日本格蘭披治大賽，壓倒同場死敵保時捷（Porsche）906，包辦冠、亞、季軍，以不完美，但又可以話係完美嘅賽果作結。

NISSAN R381（1968）

六十年代末，賽車界開始流行運動氣流力學提升車速同增加穩定程度，大家都喺呢個「潮流」有唔少新嘗試，亦出現好多而家覺得古怪嘅設計。
被日本車迷稱為「怪鳥」嘅R381，整個擾流尾翼由兩片可動分翼組成，兩片尾翼同後懸掛有連動結構，從而增加過彎時嘅下壓力，當賽車喺高速下猛烈制動，兩片分翼會豎高，進一步增加下壓力。R381唔係配自家引擎，而係配美國雪佛蘭（Chevrolet）5.5公升V8頂置活瓣（OHV）自然吸氣引擎，最大馬力450匹/6000rpm，峰值扭力54.5kgm/5500rpm，車重855kg，呢部20號嘅R381係1968年日本格蘭披治大賽冠軍車。

NISSAN R382（1969）

日產喺1968年日本格蘭披治大賽奪冠，翌年發表全自家製嘅新戰馬R382。R382係根據當時FIA第七組（Group 7）賽例設計，先後配搭過5公升及6公升嘅V12自然吸氣DOHC 48活瓣引擎，其中6公升版本嘅最大馬力不少於600匹，峰值扭力不少於62kgm，車重僅為790kg，前後懸掛均採用雙搖臂格局，呢部21號嘅R382喺1969年日本格蘭披治大賽奪冠，車手就係Best Motoring主持兼日本著名車評人黑澤元治。

NISSAN Skyline 2000 GT-R（1969）

代號PGC10嘅四門版GT-R賽車版，配日本首台街車用DOHC 24活瓣引擎（S20型），2公升直6格局，最大馬力210匹/8000rpm，峰值扭力20kgm/6000rpm，車重980kg，前後懸分別採用麥花臣支柱及半拖曳臂格局。

NISSAN Cherry Coupe 1200X-1（1973）

日產喺發展巿販前驅車嘅步伐，比豐田快咗約十年，早喺1971年推出Cherry，Cherry嘅掀背設計好受當時嘅後生仔歡迎，而且引擎容積細，易養，配1171c.c.直四OHV「筷子偈」，喺SU雙化油器配合下，最大馬力80匹。賽車版引擎容積加大至1298c.c.，改配Lucas燃料噴注系統，最大馬力調升至135匹，605kg嘅車仔有百三、四匹馬力，見佢喺富士大直路都仲幾快。長谷見昌弘後生嗰陣都揸過佢落場。

（上、下）四門版Cherry

NISSAN Fairlady ZG（1973）

第一代Fairlady Z喺1969年發表，旋即係全球大熱，本土版及出口版，分別配2公升直6同2.4公升直6引擎，之後加推咗有泵把同擾流組件一體化嘅ZG版本，呢部就係以ZG為基礎嘅賽車版原型試作車，配2.8公升直6引擎同3個Solex化油器，最大馬力300匹/7600rpm，峰值扭力32kgm/6400rpm。

NISSAN Skyline Turbo Silhouette（1982）

日產喺1973年之後，因石油危機同專注研發低耗油引擎技術，暫別日本國內最高級別賽車活動多年，直至1982年以代號R30嘅第六代Skyline重返賽車場，出戰只喺日本流行過幾年嘅Silhouette Formula。街車配編號FJ20嘅2公升直四Turbo引擎及中冷器，最大馬力205匹；賽車版改配2.1公升LZ20B型Turbo引擎，最大馬力570匹/7600rpm，峰值扭力55kgm/6400rpm，車重1005kg，一噸重，但有570匹，簡直係癲。紅黑two tone車身，車頭有Tomica logo嘅車花，相信冇邊個日本車迷未見過。

NISSAN Silvia Turbo Silhouette（1983）

Silvia Turbo Silhouette同Skyline Turbo Silhouette一樣，都係按FIA第五組（Group 5）賽例設計，鋼管式車身加個同街車Silvia（S110型，第三代）相似嘅車身。引擎與Skyline Turbo Silhouette相同，最大馬力都係550匹，峰值扭力55kgm。車手係有「日本最快的男人」之稱嘅車手星野一義。

NISSAN Bluebird Turbo Silhouette（1984）

Bluebird Turbo Silhouette係日產三款Silhouette賽車之中最後期戰車，時值Silhouette Formula尾期。引擎與Skyline及Silvia相同，都係570匹。車身拉花以1982年推出嘅健怡可樂（Diet Coke）為基礎。

NISSAN R90P 全日本原型車錦標賽JSPC冠軍（1990）

日產先後自1985及1986年參加美國IMSA及法國Le Mans 24小時賽，及後亦派車出戰C組原型賽車（Prototype）全日本耐力賽，後改稱為全日本原型跑車錦標賽（All-Japan Sports Prototype Championship, JSPC）。日產喺1990年以R90P賽車包辦全年車手及全年車隊總冠軍。R90P配編號VRH-35Z嘅3.5公升V8 Twin Turbo引擎，最大馬力800匹/7600rpm，峰值扭力80kgm/5600tpm，車長4.8米，車重900kg，睇返YouTube當年比賽片段，加速快到嚇死人！
日產喺呢個階段嘅賽車，仍然好賴外國夥伴嘅協助，R90P底盤來自英國羅拉（Lola）車廠，引擎自家製，有70%零件來自NISMO，其餘來自海外合作夥伴。

NISSAN R91CP 美國Daytona 24小時賽總冠軍（1992）

日本車廠原型賽車喺九十年代初嘅國際耐力賽大豐收，繼萬事得（Mazda）贏得1991年法國Le Mans 24小時賽，日產喺1992年奪得美國著名嘅地通拿（Daytona）24小時賽冠軍。相比R90型系列賽車，R91CP採用大量碳纖維製造底盤，佢都係配引擎編號VRH-35Z嘅3.5公升V8 Twin Turbo引擎，但最大馬力調低至680匹/7200rpm，以換取更可靠嘅表現，峰值扭力80kgm/5200rpm。車手陣容可謂鋼鐵組合，包括長谷見昌弘、星野一義同埋後來參與開發、測試R35型GT-R嘅鈴木利男。而呢次出戰Daytona 24小時賽嘅幕後總指揮，就係R35型GT-R總工程師水野和敏，真係粒粒巨星。

（左起）長谷見昌弘、星野一義、鈴木利男、Anders Olofsson

NISSAN NP35（1992）

1991年，FIA宣布世界原型車錦標賽（WSC）自1992年起，所有參賽車輛必須轉用3.5公升自然吸氣引擎，禁止Turbo引擎賽車參賽。日產立即開發全新賽車NP35，配編號VRT35型3.5公升V12自然吸氣引擎，最大馬力630匹/11600rpm，峰值扭力40kgm/9200rpm，一睇個specs：3.5公升、V12、自然吸氣，好大浸F1味。好可惜嘅係，歐、美、日喺呢段時期嘅經濟轉差，好多私人車隊及廠隊都因財政問題退出（包括日產），WSC時代告一段落。
咁新款嘅賽車造起咗，但冇得比賽，結果只喺1992年全日本原型車錦標賽JSPC壓軸回合，以23（23日語諧音與NISSAN相似）落場。

NISSAN Calsonic Skyline GT-R 全日本房車錦標賽（1990）

R32型Skyline GT-R A組賽車雄霸90年代初全日本房車錦標賽（JTC），總共達4個賽季，最先參加1990年賽季嘅只有兩款賽車，分別披上Calsonic及Reebok拉花。
動力系統建基於街車採用嘅RB26DETT型2.6公升直6 Twin Turbo引擎，出戰JTC嘅調校規格，最大馬力為550匹/7600rpm，峰值扭力50kgm/6000rpm，5前速手動波箱，車重下限1250kg。車手配搭方面，早期有星野一義/鈴木利男，及後鈴木利男忙於參加其他賽事，1993年改由影山正彥配星野一義。總計90、91、92、93四個賽季，A組R32型Skyline GT-R連續喺29場賽事奪冠，前無古人。

NISMO GT-R LM 1995 法國Le Mans 24小時賽（1995）

日產告別WSC之後，決定轉戰法國利曼/勒芒（Le Mans）24小時賽GT1組別，並訂下「以GT-R連續出戰三屆」嘅目標。NISMO GT-R LM 1995建基於R33型Skyline GT-R街車。GT-R LM屬前置引擎後驅佈局，因為賽例唔容許有四輪驅動系統。2.6公升RB26DETT引擎最大馬力調升至450匹/7200rpm，峰值扭力50kgm/4400rpm，車重下限1280kg。車手包括福山英朗/粕谷俊二/近藤真彥，NISMO GT-R LM 1995最終排全場第10名，組別第5。
翌年戰車引擎容積加大至2.8公升（2795c.c.），最大馬力600匹/7000rpm，峰值扭力63kgm/5500rpm，車手包括長谷見昌弘、星野一義及鈴木利男，可惜總成績只排15，難以匹敵純種GT1組別賽車，例如Porsche 911 GT1，日產決定升呢「玩大啲」，開發全新戰車R390 GT1。

NISSAN R391（1999）

日產喺1998年法國Le Mans 24小時賽屈居兩部保時捷（Porsche）911 GT1，得一席季軍，但保時捷同年宣布暫別Le Mans，1999年Le Mans會唔會係日產嘅天下？日產為配合當時新引入嘅LMP規格製作咗Open-top嘅R391。R391配VRH50A型5公升V8自然吸氣引擎，最大馬力600匹，底盤由日產同G-Force Technologies共同開發。日產喺1999年派出兩部R391參賽，惜其中一部（即23號呢部）喺排位賽時發生嚴重意外，結果只得另一部（22號參賽），但呢部車喺開賽後7個半小時退出。
廠方原本計劃2000年以R391再戰Le Mans，但隨住雷諾收購日產，大幅削減賽車活動開支，R391計劃立即遭拍停，可惜！可惜！廠方之後專注於本土全日本GT錦標賽（JGTC），直至2015年。

NISSAN GT-R NISMO GT3　澳洲Bathurst 12小時賽（2015）

GT-R NISMO GT3配VR38DETT 3.8公升V6 Twin Turbo引擎，最大馬力600匹/6500rpm，峰值扭力70.4kgm/5000rpm，6前速順序式推拉波箱，後輪驅動，極速約350km/h。每部售價接近4000萬日圓（約272萬元）。日產喺2015年派出GT-R NISMO GT3出戰澳洲Bathurst 12小時賽並輕易奪冠，今年捲土重來，最終以1.3秒之微輸畀麥拿侖（McLaren）650S GT3，只得第二。

R35 GT-R安全車

同日另有日產經典汽車賽，參賽車輛均屬70年代型號，如B110型或B310型Sunny Coupe

曾經或現役效力日產嘅賽車手出席Talk Show

想Grid Walk？需要另外買票（3000日圓），記者當然唔使啦！