Photos: Heat Production

經典嘅日本汽車，豈止跑車、房車、又或者係載客量大嘅私家車。 

其實，日本嘅商用車或半商用車，喺世界車壇嘅角色相當吃重，有啲型號，未必超級襟捱，亦未必有靚絕嘅易手價，但卻係好多公司、小企或新成立公司擁有自家車輛嘅踏腳石。

萬事得Bongo曾經喺全球叱吒一時，但隨住日本經濟狀況同環球商用汽車巿場嘅重大轉變，呢個自1966年誕生嘅車系，喺2016年6月底終於告一段落，啱啱好50年。

今次介紹嘅萬事得（Mazda）Bongo，喺2002年製造，同年於香港登記出牌。我喺千禧年入行，我仲記得嗰時馬路上仲有唔少Bongo（出口版曾被稱為E1800/E2000/E2200/E2500，視乎銷售地區及所配引擎），同佢嘅孖生兄弟福特（Ford）Econovan，當然，最多人用嘅一定係豐田（Toyota）HiAce、間中亦會見到日產（Nissan）E24同三菱（Mitsubishi）L300。

唔知你同唔同意，以前日本車廠為新車命名嗰陣，幾有心機，要改個有意思同易記、易讀，兼且響亮嘅名字。講真，我好佩服萬事得搵到一個原本係非洲西部土著土話嘅用字——Bongo。執筆時翻過動物百科全數，上過wikipedia，無意中發現，小學時喺課外書見過嘅「斑哥羚羊」，原來所指嘅就係Bongo。

今次無端端搵部Bongo嚟介紹，源於一次與代理人員嘅閒談中，講到佢哋其中一部公司車——Bongo。呢部Bongo原屬本地一間大專院校，經過一段時間使用後退役，之後被賣到易手車巿場，萬事得本港代理——宏益汽車（香港）有限公司遇到呢部八座位電油版「低咪盤」，買返嚟做「公司車」，供職員往返各個維修中心及外勤之用。

話明「低咪」，前任車主使用量唔高，十多年來只累計行駛21000公里。

今次試車發現，全車近乎唔覺有雜聲，2公升直四自然吸氣電油引擎好精神，喺我「一支公」狀態行咗轉龍翔道、呈祥道，五波行車，時速約80km/h嗰陣，引擎轉速約2500rpm，呢副引擎採用單頂凸輪軸（SOHC）設計，大部份嘅動力都集中喺頭、中段。

好唔容易翻查到峰值扭力數字，只有約18kgm/3700rpm，輸出數字與同期嘅日本2公升中型高身MPV，例如Noah、Serena及Stepwgn差不多，但最大馬力只得90匹。

4000rpm之後嘅引擎運轉質感相對粗糙，聲浪亦較大，「哈哈！人哋係客貨車嚟㗎！John Chan你想點啫？」

呢部Bongo，追源溯本可以去到1983年，廿幾年來不斷升級改良，相比豐田HiAce，佢比人哋少咗兩次大轉款。據熟悉日本商用車發展史嘅日本行家表示，Bongo本來喺1992/1993年左右大轉款，但九零年初日本泡沫經濟爆破，萬事得決定「睇定啲」，決定唔搞大轉款，只係不斷因應各地法例增強車身剛性、增加及改良安全設計。

嚟到2002年嘅輸港版本，有電窗，有安全氣袋，冷氣又好夠凍，車身防銹程度仲幾好，以營業車嚟講，咁嘅質素算好好。唯一不足，係呢部車曾經長時間泊露天位，部份車身油漆可能因日光照射角度而變淡。

揸咗大半日，Bongo嘅操控都唔錯，易手上，睇位易，自問平時揸車企理，有望鏡，有shoulder check習慣嘅巴打，點會舞佢唔掂吖。不過，客貨車懸掛佈局以應負高載重量為先，前懸雙搖臂加扭力桿、後懸硬軸（死擔）加葉片彈簧，唔通你想佢舒服過日本行政級房車咩！事實上，置身引擎艙上方嘅座位，輾過密集起伏路段，彈跳真係多咗啲。

文首提過環球商用車巿場近年有咗重大變化，睇香港吖，過往由日本品牌陣營獨大嘅局面已被打破，來自南韓嘅、歐盟成員國嘅，以至中國內地嘅都有，部份嘅設計充滿創意同突破，安全程度亦大有提升，咁咪好囉，選擇多咗嘞。