Photos: Toyota Japan

來自日本傳媒消息，自2005年6 月正式喺日本停止生產嘅豐田（Toyota）四驅越野車HiLux，將於今年八月起重返日本巿場。 

現時所知嘅消息相當有限，究竟係唔係從泰國豐田生產線「逆進口」到日本本土，抑或好似十幾年前咁，喺豐田屬下品牌日野（Hino）喺東京都羽川（Hamura）工場生產呢？暫時都係未知數。

上、下圖皆為泰國豐田分部生產線製作嘅第8代HiLux

今代（第8代）HiLux喺2015年5月發表，MenClub當時都介紹過。點解日本總廠當時唔立即喺泰國引入，要拖到兩年多後先「後知後覺」呢？傳聞原因之一係當時日本汽車巿場有大批「靚價水貨」美版福特（Ford）同佳士拿（Chrylser）Pick-up殺到，再加上國產品牌Pick-up正處於低潮，豐田見唔對路，暫緩HiLux「逆進口」計劃。 

呢代HiLux喺泰國製造，出口到澳洲及世界各地。據悉，八月喺日本發售嘅版本，就係以第8代為基礎。

引擎方面，除咗有目前供應東南亞、歐洲同南美地區嘅1GD-FTV型2.8公升直四柴油Turbo引擎，有說會新增2GD-FTV型嘅2.4公升直四柴油Turbo新機器，最大馬力150匹/3400rpm，峰值扭力40.7kgm/1600rpm，兩款機器都已達到歐盟六型標準。

相比1GD-FTV，新機器最大馬力細咗26匹，峰值扭力少咗2.1kgm。喂！兩副引擎嘅輸出好接近喎。

陣式底盤

波箱方面，有6速自動及6速手動，四驅設有三種驅動模式：H2（後輪驅動）；H4（四輪驅動）同4L（差速鎖合四輪驅動）。 

等睇各位巴打喺comment喪插「柴油商用車15年死期法例」。