{ SKIP }
文:MenClub John Chan  
POSTED ON 03 Nov 2017

靚係好主觀。

近年,有部份年青女藝人,出道冇幾耐就被冠以「女神」「乜乜女神」或「女神乜乜」。講真,呢啲「女神」眼、鼻、耳都生得唔靚,既唔精緻,亦唔可愛,聲線亦唔吸引,更談唔上有氣質,部份更是怪怪誕誕。每次喺電視、手機或雜誌見到佢哋,都即刻好想轉望綠色植物或藍天碧海,清洗雙眼。

我唔係想話:「都係廿幾年前嘅靚女好」,畢竟,「時代的技蘭是不斷在轉動」,今日有今日嘅靚,但想喺今日遇到「嘩嘩聲」嘅靚女,機會真係愈來愈少。

喺新車嘅情況亦差不多,「而家啲車唔靚」呢句話,已經流傳於環球車迷口中約20年,我身為汽車傳媒多年,間中又會想想原因何在。

可能係,新車愈來愈要注重安全,頭尾潰縮區方方正正,提高撞擊抵禦能力,頭尾造型被局限,仲點可以好似七、八十年代新車,車頭又斜又扁兼加盞跳燈?另一可能係,車廠將資源集中投放喺安全、車廂科技及動力系統,撥放設計嘅錢有減無增。新車周期愈變愈短,車廠大幅擴展車系,呢啲都可能令設計人員無奈「交行貨」或冇充足時間設計「靚車」。仲有,甚麼「家族相」理論係令新車愈變沉悶嘅主因,雖然話十個兄弟姊妹都出自同一父母,但真係有需要咁似樣咩?

我唔敢話全球車廠嚟到將近2018呢一刻,經已覺悟前非,部部新車皆「靚女」,但近三幾年,無論係日本、歐洲、北美嘅車廠,都試圖或已經推出咗一啲令人睇得舒服順眼,又具有獨特風格嘅新車,喺燈位遇到會不自覺望多兩眼。

例子有Audi第二代 A5 Sportback、BMW 4系Gran Coupe、第三代Mazda6,同埋我今年好Like嘅Volkswagen Arteon。

Arteon將會接替Passat CC,但Arteon有別於Passat嘅四門轎跑格局,Arteon屬五門格局,車尾裝有fastback掀背尾門,提存行李放便好多,事實上,掀背尾門非常切合歐洲,以至亞太區年青主流買家嘅用車習慣。

我鍾意Arteon原因有幾方面,佢嘅鬼面罩相對低調,唔會一大塊黑網「撻」喺車頭,事實上你唔會輕易睇到鬼面罩,只係見到多條橫線,而呢啲橫線又同頭燈與泵把相連,引擎艙蓋嘅外緣亦覆蓋至沙板部份,整個佈局有鮮明個人風格,卻不至於嘩眾取寵,呢種路線好啱Volkswagen;車尾明顯冇車頭咁精彩,咁有視覺刺激,但企近車尾望向掀背尾門同車側,Arteon嘅線條好柔滑,係好襟睇嘅種。

論體積,Artoen已達到德國中型行政房車嘅級數,車長約4.9米,闊度約1.9米,軸距2.8米,所以一進入車廂,已覺得駕駛艙同後座好闊落,卻冇同級歐、日對手嗰種因空間寬敞而產生嘅疏離感。Arteon嘅中控台、中槽嘅斜度,從車廂外望嘅視界,以至座椅造型都令整個車廂佈局好緊湊,暗暗中帶跑味。我諗呢啲就係車迷口中嘅Coupe Feel。

Arteon雖然車長,車身亦算闊,但喺高速公路上嘅維修路段左穿右插,仍然係好靈活。我喺漢堡紅燈區因搵位影相而迷路,兜咗入小社區路段嘅死胡同,兩旁都有大量私家車違泊,我輕輕鬆鬆就穿過,掉頭亦唔覺有壓力。

Arteon喺現階段只配一款兩公升直四Turbo電油引擎,馬力輸出分別為190匹及280匹,後者配4 MOTION四驅系統,亦係我哋今次喺漢堡試駕嘅型號。

280匹版本配編號EA888嘅機器,佢最大馬力喺5100rpm至6500rpm輸出,35.7kgm峰值扭力由1700rpm延伸至5600rpm,好多車迷都熟悉EA888嘅動力分布範圍,基本上頭、中、尾段都照顧到,扭力好,爆炸力亦好,就係因為太熟悉,亦都太體貼賣力,所以驚喜欠奉。

所以,有時太好招呼,面面俱圓唔係好事。

今次試嘅Arteon R-Line配20吋胎軨,賣相就真係得分極高,擺喺秋日陽光斜照嘅漢堡海岸高級住宅區,差啲以為係法蘭克福車展(IAA)嘅Volkswagen概念車。

靚有代價嘅,R-Line配Pirelli P Zero 245/35 R20輪胎,喺50km/h至60km/h城巿慢溜再加速,總覺得未夠「爽」同「快」,我覺得同車身相對重磅(1641kg)及輪胎尺碼偏大,滾動阻力大有關。

但睇0至100km/h加速數字,Arteon絕對見得人,更貼近高性能房車門檻,只需5.6秒,極速可達250km/h。

Arteon呢種具備掀背尾門,又有四門轎跑味嘅新車,話到底都要靠實用空間吸客。呢方面,Arteon的確幾吸引,未放平後座椅背已有563公升,放平之後可增至1557公升,好多旅行車或中小型MPV都比不上。

請恕我老土或幫Volkswagen Hard sell,揸住呢類車,星期六朝早入迷你倉搬Hi Fi、喇叭、唱片、書本,下晝又可以揸去酒店同老婆High Tea,夜晚再揸去「砍」都得。

你有幾何遇到作風務實又體貼養眼嘅靚女?

有嘅話,好好把握機會。

Volkswagen Arteon規格

售價:待定

代理:Volkswagen Hong Kong  www.vw.com.hk

車型:五門五座

體積:(長)4862mm x(闊)1871mm x(高)1450mm

軸距:2837mm

引擎形式:1984c.c. 直列4汽缸,缸內直噴,渦輪增壓,前置引擎

馬力:280匹/5100rpm-6500rpm

扭力:35.7kgm/1700-5600rpm

波箱:7前速雙離合器自動

懸掛:(前)麥花臣支柱;(後)多連桿

0至100km/h加速:5.6秒

極速:250km/h

車重:1641kg

耗油:7.3L/100km(巿區及公路混合計算模式)

行李艙:563公升,可擴展至1557公升

油缸:66公升

輪胎:(前、後)Pirelli P Zero 245/35 ZR20

 

「買得Polo,好心你俾多些少買Golf 1.4(150匹)啦!」 我多事,加把咀「咁買得Golf 1.4,點解又唔添多啲買GTI或Golf R呀?」 好在,地球仲有好多小車fans,亦都有個叫Volkswagen嘅老招牌 繼續陪佢哋癲,推出好似Gol ...
autoreviews
【一公升Turbo當道】Volkswagen Polo 1.0 TSI
06 Nov 2017
Bugatti Veyron以過千匹馬力成為「地上最強機器」呢類說話相信你聽過好多次。今次要介紹Bugatti六部「Legend (傳奇)」系列究竟有幾傳奇。由上年年中開始,Bugatti已公佈會以Veyron Grand Sport Vitesse (即係比普通V ...
autoreviews
最後一塊併圖 Bugatti Veyron「Legend」特別版
17 Sep 2014