一款推出超過10年，而家仍然靠facelift喺車壇「生存」嘅車，點解仲要拎出嚟試車？

畀在係保時捷（Porsche）911，呢類玩味咁濃嘅車都未必會試，更何況係走大眾路線嘅豐田（Toyota）？ 

用部份網民角度分析：

1. 「實係收咗人錢啦，梗係要試㗎！Toyota出86豆腐花你都要大大啖嗗落去話好味啦！」
2. 「好心啦！十年有凸嘅車，仲試嚟把鬼咩，買咗『第一浸』嗰啲都幾乎要劏啦！」

自千禧年嘅日本汽車工業，十年唔大轉款，即當地業界慣稱「Full Model Change」係非常少有，例子有：2003年發表，去年先大轉款嘅豐田微型MPV Sienta，同2006年1月推出嘅Previa。 

先撇開「豐田慣性收視」「豐田光環」呢啲先入為主嘅因素，豐田Previa、本田Odyssey呢類介乎Alphard（大型豪華MPV）同Noah（高身中型MPV）嘅中大型MPV，仍然係有相當多用家捧場。

喺香港，你可能覺得呢句未必講得通。

但喺日本本土，Estima（即Previa日本本土版）有好高認受性同需求，係千真萬確，你上日本自動車販賣連盟（JADA）網頁嘅公開累積銷售資料睇吓就知。

自從愈來愈多人香港人買Alphard，再加上中小型MPV愈來愈熱鬧，Previa受注目嘅程度的確不及以前。當然啦，06年大轉款之後，一路靠中等及小規模facelift嚟「保鮮」，確實唔易留住唔新唔買嘅香港用家。

MenClub年初時曾引述日本傳媒報道：豐田或為Estima車系劃上句號，立即引來好多Estima/Previa fans嘩然，有啲話：「喂！你MenClub唔好亂講喎！」「Estima/Previa車系點會死㗎！傻啦！」

而家事後孔明，再有日本傳媒引述接近豐田人仕嘅消息指，廠方喺2015年認真檢討是否為車系作結。但係，廠方最後拍板認為：Estima嘅底盤同車體，好適合作為燃電動（Fuel Cell）MPV嘅發展平台，更有說法指，2020年東京奧運前，豐田會少量製作Fuel Cell版新一代Estima供賽會使用。

四年後嘅事，太遠喇。

Estima今年6月喺日本發表咗facelift版，出口版（Previa）早前到咗香港。Facelift後嘅Previa，8座位版由41萬元起，7座位版由47萬元起。只有2.4公升直四引擎級別，再冇3.5公升V6，波箱係無段變速CVT配七速加減。 

我有五、六年冇揸過Previa，今次試揸嘅係七座位版，打開電趟門望吓中後排座椅，熟悉佈局，內櫳同座椅以黑、灰嘅真皮同仿猄皮為主，唔再係以前滑溜得嚟有少少「leung」味嘅淺色真皮座椅，雖然新配搭唔算得上好潮，但我覺得係比以前「in咗」。

Estima/Previa車系自1990年正式巿販，一路都係sell線條圓滑流麗，咁嘅好處係：五、六年後就算唔大轉款，都唔會覺得過晒時。

我坐喺中排座椅向前望中控台同錶板，成個佈局唔算好有驚喜，但視覺上幾簡潔，唔會一大堆掣擺晒喺你面前，儀板內藏喺中控台上方嘅半圓拱內。

我認為，MPV用家最重要係留意車速、汽油存量同時間，其實唔使太多資訊，儀錶板冇必要咁大咁誇，Previa而家呢個size最好，位於軚盤一方嘅中控台，其實有個小盒子，你鍾意擺乜，你話事，我覺得放油卡、迷你八達通、散紙包都唔錯。

手套廂內附智能手機或音樂裝置USB接線

七座位中排兩張獨立座位舒唔舒服？我覺得ok啦。

當然，要雙腿伸得舒服，調校到好似Business Class咁嘅角度，後排最好唔坐人，係唔係好似Alphard咁駕勢呢？交番畀你判斷，我用車好著重實際。

我喺後排座椅玩咗好耐，今次輸港版有電動摺合功能，喺車尾撳個掣，成組後排座椅會自動摺好或升高，好實用。

我同朋友講Previa有個咁嘅新功能，好正，佢話：「有幾煩呀！自己摺好辛苦咩！」我冇駁佢，但希望佢將來喺夏天試吓，喺室內停車場又或者喺街邊錶位摺櫈，就算你幾熟手兼快手，都會身水身汗，而家撳個掣輕輕鬆鬆，幾好！

值得留意，Previa嘅後排座椅椅背，係有電動調校斜度，唔使左摷右摷搵把手。

唔少人懷念以前Previa嘅3.5 V6版本，6前速自動波，280匹，力大無窮，而且，耗油量唔係想像中咁高，唔算好大食。而家，只設2.4公升直四引擎一個級別，170匹，配搭附有7速加減嘅無段變速（CVT）自動波箱，冇Turbo又冇Dual Clutch自動波箱，擺明唔夠「搶眼」，咁實情係唔係咁差？

我覺得2.4公升直四自然吸氣引擎放喺Previa，夠用之中仲有少少餘裕，我試車前最擔心係CVT自動波箱嘅表現。試咗車有幾個小時，走過山路同長命斜，用過D波同手動加減模式，我對波箱同引擎嘅契合程度，可以畀到88到90分。

首先，D波狀態之下，要喺斜路突然大油加速，反應算幾快，動力嚟得實在，比四、五年前嘅豐田CVT波箱，好咗好多。手動轉波模式之下，二、三波嘅設定算幾緊密，喺進入迴旋處之前嘅拖波減速，同之後嘅重新加速，你會覺得咁嘅設定好實用，即使佢只有170匹，峰值扭力亦只有22.8kgm，但揸起嚟竟然有爽快嘅感覺，意料之外。

動態方面，Previa嘅前懸同底盤前方都好實淨，喺隔絕引擎艙噪音同震盪進入車廂嘅功夫上，明顯比Noah高兩班（Noah fans請唔好介意），雖然我唔會同你講Previa係「好好劈」，彎路唔錯嘅MPV，但你有機會做車主，或做過呢代Previa車主的話，一定認同佢唔係操控零分嘅悶MPV。

我好明白部份本地新車買家嘅心態：「買車梗係買佢最新嗰一浸啦！三幾年後仲係呢個款我買嚟把鬼咩！」始終主流買家一世人會買幾多部車吖，有得買新車，又用成四十幾萬，點解唔威到盡？

但係，MPV係講求空間、寬敞、舒適同實用，當然仲要價靚啦。Alphard咁大部，用唔著，又嫌Noah四四方方，車型唔夠靚，其實好值得考慮Previa，而且今次Facelift喺動力系統配搭，同後排座椅與置物空間嘅方便程度都大增，口氣大啲講句：「你搵得番好似我咁好先算啦！」

Toyota Previa規格

售價：$475,000（7座位）$419,650（8座位）

代理：Crown Motors www.crown-motors.com

車型：五門七座

體積：（長）4820mm x （闊 ）1810mm x （高）1750mm

軸距：2950mm

引擎：2362c.c. 直列4汽缸，前置引擎

馬力：170匹/6000rpm

扭力：22.8kgm/4000rpm

波箱：無段變速自動（附7速手動轉波功能），前輪驅動

懸掛：（前）麥花臣支柱；（後）扭力桿

制動：（前）透氣碟；（後 ）實心碟

車重：1730kg-1745kg

耗油：11.2km/L

輪胎：215/55 R17