Photos & Video: Heat Production

直至執筆前，我仍然唔明白越野路華（Land Rover）點解喺Evoque車系增設開篷版（Evoque Convertible）。 

哈哈！其實而家有唔少品牌嘅SUV車系，我都唔明點解會「爆」出嚟，佢哋好多時同其他家族成員嘅分別，只係在於Size唔同。外形同內櫳間格，基本上係差不多。可能有人覺得咁係OK嘅，始終而家唔少人買新款SUV都係「空間先抉」，夠大夠闊落就得。

Evoque Convertible唔可以被清楚歸類為SUV，雖然佢衍生自Evoque車系，但佢上半身徹徹底底係開篷車，如果你當佢係其他Land Rover咁揸「入出」或「擒山」，我會覺得唔安心，咁係好不智；當佢係開篷車用，咁就啱數嘞。

好，開篷車嘛，通街都大把高認受性選擇，成條龍排住出場有排未輪到

Evoque Convertible。

「喂！咁講法好似好淒涼喎。」

我相信Land Rover好清楚呢款車賣得到幾多，睇吓近年稍為相近嘅設計，例如日產（Nissan）喺北美推出嘅Murano CrossCabriolet，都唔係好賣，小眾設計，由發表到停產只係短短三年左右。當然，我覺得Land Rover行出嚟，話要搞部SUV x Convertible嘅新車，一定比日產有號召力得多，就算只係上網睇相，Evoque Convertible都靚仔好多（相對而言）。

但係，點解MenClub會試Evoque Convertible？好簡單，因為佢夠獨特，巿場上冇啲咁嘅車，又賣得貴，89萬元起錶，有話題，又出自Land Rover，車系又掛住Range Rover牌頭，點都要望吓。 

喺現今Land Rover嘅標準，推出首部開篷四座越野車，一定要大幅度補強同加固底盤，結果開篷版比三門硬頂Coupe版重咗約250kg，車重達1936kg（淨重）。

兩噸車，數字上比好多日本SUV都重得多，而且引擎配搭，都係Evoque三門及五門版用開嘅240匹2公升直四Turbo引擎，峰值扭力輸出同樣係34.7kgm。喺一般巿區道路開開停停，起步冇想像中咁鈍，喺東區走廊遇上慢車cut線突圍加速，一腳伸落油門，爆發力原來都可以幾爽，呢副9速自動波同引擎喺S波嘅狀態幾合拍（D波懶咗啲），兩者都湧住湧住上，雖然0至100km/h加速數字真係唔靚，只有8.6秒，但實時嘅反應同氣氛仲算幾好，可以收貨。

操控，肯定唔會好似三門版或五門版咁醒咁輕盈。

跑大彎窄彎都無時無刻感到部車嘅動量好大，就好似廿四孝老豆喺超巿出嚟左右手各抽住兩大袋，心口再用孭帶帶住阿仔去街街，背脊再加個小背囊咁。好在，Evoque Convertible嘅重量分布算幾平均，揸住佢出入迴旋處，喺落差大嘅山路髮夾彎畀住油進出，成部車動態好穩定、循跡性好好，亦都感到底盤、懸掛剛性係頂得住有餘，可以畀你隨便「質」，揸走個零鐘，覺得唔算鈍唔算笨。

試車拍片時，我講過Evoque Convertible最令人開心，亦都係佢最特別之處，就係佢嘅駕駛感，打開篷，高高在上，喺司機位望出去，好闊好開揚，頭頂又係藍天白雲，近似嘅feel，除咗喺泰國租開篷Jeep仔試過之後，我已經好耐未感受過。Evoque Convertible嘅車廂唔講得上好豪華，但因為ride quality幾好，車身剛身好高，無論揸同坐，都覺得呢部係高級開篷車（首先你要對乘坐質素同車身剛性有最起碼嘅認識），唔係Jeep仔鋸走個頂加個電動篷又賣成90萬咁hea咁簡單。

今次代理未有借出防亂流板，所以試車時覺得高速行車嘅亂流頗大，明嘅，車身咁高，難免，但防亂流板裝正喺後座，裝咗後座唔可以載人，同其他開篷車一樣，呢啲嘢你自己度掂佢。

行李艙251公升，望落應該仲細個開篷版MINI嘅行李空間，但Evoque Convertible行李艙設計似個盒，算幾四仔，開篷閂篷都冇影響佢嘅容積，細就係細咗啲㗎喇，如果要空間至上，間中要載屋企人，都係揀番三門或五門版穩陣，Evoque Convertible擺到明係溝女/溝仔（請自行代入）嘅Second Car，意思係，呢部只係眾多「溝女/溝仔車」之中嘅Second Car或Third Car，甚至Fourth……

「咁有冇位擺單車？點夠擺MTB呀？」

……踩少一陣係唔係會死？

講到尾，好似Evoque Convertible呢類車，特別係幾特別，但你要有心理準備，唔好以為揸落石澳、赤柱就會引來注目，閂咗篷都聽到讚嘆嘅「嘩嘩聲」，因為你要預咗好多傻仔傻妹指指點點，藐咀藐舌，甚至當你怪物咁睇。另外，亦要有唔少妥協、佢行李艙細，而且賣得貴，仲有好多缺點，我懶去數，你喺facebook出個post，話你想買Evoque Convertible，相信好快有巴打幫到你。