Video: craft STAR laboratory/健一郎

日產推出第一代Serena嘅嗰一年，我仍是「Form 1」仔，當時聽講某香港小姐係全港第一個Serena買家…… 

喺接近26年後嘅今日，嗰位港姐仲Keep得幾好，而Serena，依然係日本中型MPV嘅皇牌，喺香港馬路曝光率仲係好高。 

講真吖，如果一開口就讚到最新一代Serena「天上有，地下無」，咁樣肯定係呃鬼你，因為喺日本，呢類針對大眾化同實用型買家嘅多座位家庭汽車，可供車廠「大幅度」發揮創意同「玩嘢」嘅空間確實唔多。 

尤其是中型高身MPV嘅另外兩位主要對手，豐田（Toyota）Noah/Voxy、本田（Honda）Stepwgen，都同日產（Nissan）Serena鬥得難分難解，既唔會作「離經叛道」嘅設計大改動，更加會睇住對手有乜新動態。

你有新功能咩，我都有，擺到明，你做乜我都會盡量跟到足。 

其實，MPV嘅嘢，最緊要都係實用空間夠大，坐得舒服，安全，襟用，夠晒啦！

今次去到日本橫浜實地試駕即將抵港嘅新Serena，第一個好印象係第二同第三排座椅嘅移動幅度大咗好多，第二排前後移動有成690mm，如果第三排唔坐人，第二排真係可以褪到有咁後得咁後，較斜椅背，瞓個覺，爽呀。

掉轉咁講，如果第二排用嚟載小朋友，可以將呢排座椅推前啲，畀小朋友「黐貼啲」揸緊車嘅爸爸或媽媽，父母亦更方便睇實小朋友有冇作反。

我一向試呢類MPV都好注重第三排乘坐質素，始終一家人或一班人坐同一部車，乘客感不能有太大差別，自己人嘛，點可以厚此薄彼先？親身見過有人叫老媽子老豆坐最後排，仔女坐中排，老人家走轉屯門公路落車話車尾好跳，張櫈又薄，坐到「喉悶悶」……haha

新Serena第三排座墊比上代厚，雖然冇可能好似第二排咁厚㗎喇（要考慮摺起之後唔可以太阻礙空間），但軟墊用咗新技術製造，承托力幾好，畀到表層軟熟同中、深層韌挺度都兼顧到，而且面積大咗，對膝頭位內側嘅支承唔錯，滑動空間亦有120mm距離，我真心覺得幾周到。

揭背尾門新增「門中門」，令我諗起寶馬（BMW）3系Touring同5系Touring，創意爆燈程度談唔上，但好好用，尤其是喺香港啲超狹窄停車場，呢個設計一定幫到手。

新Serena喺日本有稱為「Pro Pilot」嘅公路自動駕駛功能，暫時只配備喺部份日本本土型號（JDM）。今次試嘅版本配2公升直四自然吸氣引擎，最大馬力150匹/6600rpm，峰值扭力20.4kgm/4400rpm，係大家熟悉嘅日產MR20DD直噴引擎，勝在可靠穩陣。

試車時發現嘅最大改進：喺3300rpm至4500rpm呢個區域嘅引擎聲浪明顯低咗好多，而呢個轉數區域正正係負載高同爬坡時經常去到。

另外，感覺上，新Serena嘅無段變速自動波箱，喺2000rpm至3500rpm突然大油加速嘅傳輸動力質感都紮實咗，雖然冇得實時做A/B Test，喺同一場合拎今代/上代Serena揸一揸，比較吓，但我刻意喺載住四/五個大人嘅情況上長命斜（類似香港九龍塘歌和老街），唔畀咁大油，睇吓引擎同波箱可以有幾「韌力」，結果發現新Serena喺2500rpm以內，波箱傳遞動力嘅效能係高咗，希望日後你去showroom試車都feel得到。

喺2011年，我試過啱啱抵港嘅上一代Serena，當時覺得佢懸掛軟咗啲，冇Noah同Stepwgn咁韌淨。

今次喺橫浜地區附近嘅首都高速灣岸線同橫浜巿街道，分別以唔同速度試過車，新Serena仍然嘅懸掛調校仍然偏向舒適一面，韌挺度雖然已比上代高咗，但我個人口味覺得可以再韌啲，好在喺高速行駛經過橋駁時，浮盪感比上代大幅度降低，呢樣要讚。

據了解新Serena喺車架前半部同前懸毗鄰位置，新增咗唔少補強設計，喺進出橫浜巿區，接連首都高速嘅山下町交匯處環型路，畀住大油左扭右扭，feel得到車頭、前懸同A柱成個組成部份都比上代硬淨咗唔少，類似感覺喺今代本田Stepwgn都有。

如果你問我，今代日產Serena、今代本田Stepwgn同豐田Noah，三部車點揀，我都唔知揀邊部好，因為一如文首提到，佢哋三者都係我中有你，你中有我。

又如果你一早假設咗Noah有「慣性收視」，Stepwgn來自本田，好揸啲，我建議你先冷靜一下，幫個腦reboot一次，試埋今代Serena先作最後決定。

代理：Honest Motors www.nissan.com.hk

車型：五門八座

體積：（長）4770mm x （闊 ）1740mm x （高）1875mm

軸距：2860mm

引擎：1997c.c. 直4汽缸，前置引擎

壓縮比：12.5：1

馬力：150匹/6000rpm

扭力：20.4kgm/4400rpm

波箱：無段變速自動，前輪驅動

懸掛：（前）支柱式；（後）多連桿

制動：（前）透氣碟；（後 ）透氣碟

油缸容積：55公升

車重：1620kg-1680kg（淨重）

耗油：16.6km/L（日本JC08測計模式）

輪胎：Yokohama  BluEarth E52 195/65 R15 91S（前、後）