{ SKIP }
文:MenClub 魏文青  
POSTED ON 10 Oct 2017
日本少年漫畫週刊《少年Jump》幾十年黎曾經連載過無數經典作品,其中有好一部份都係熱血格鬥風格,例如《龍珠》、《Naruto》、《One Piece》之類,而呢啲作品亦成為各年代少年們嘅集體回憶,但如果只論戰鬥嘅有趣程度,究竟邊一部作品能夠傲視群雄呢?日本網站Goo就搞咗個網上票選,由日本網民選出「最有趣嘅能力戰鬥作品」!

第十位 《Bleach》

當年與《One Piece》、《Naruto》並稱三本柱,係支撐日本少年格鬥漫畫嘅基石,《Bleach》當年靠嘅就係充滿特色嘅能力設定以及爽快嘅戰鬥場面。可惜中後期越黎越公式化,最終章不論敵我嘅能力都以香港樓價級速度急升,變成「我殺你但其實殺你唔到,你反殺我但其實我又冇死,最後我叫得大聲啲所以就殺咗你」嘅回合制戰鬥。

第九位 《最強學生會長》

講述由黑神目高帶領嘅箱庭學園學生會處理各種超乎常人嘅「學生煩惱」。能力設定「異常性」及「過負荷」相當獨特。

第八位 《Naruto》

冇錯,被非常多人譽為神作嘅《Naruto》只係排第八。雖然以忍者為主題嘅格鬥漫畫絕不在少數,但《Naruto》仔細嘅世界觀、「查克拉」嘅系統,以及早期嘅比較「樸實」嘅戰鬥,當時的確係令讀者驚艷。排名第八嘅原因,好有可能係因為對手太強勁。

第七位 《北斗之拳》

武論尊原作、原哲夫作畫,《北斗之拳》除咗背景設定獨特(核子災難後嘅弱肉強食世界),最令人印象深刻嘅就係充滿暴力感嘅粗獷作畫、肌肉發達嘅人設、華麗誇張嘅招式(同招式名),以及「啊噠噠噠噠噠噠…你已經死了」交織出嘅熱血故事。

第六位 《我的英雄學院》

目前連載中嘅作品,亦係整個排行榜中最「年輕」嘅作品。講述世界上有8成人都有稱為「個性」嘅能力,而有部份人用此作惡,相應地產生捉拿佢哋嘅英雄。而主角綠谷本身係冇能力嘅少年,但堅持加入專門培訓英雄嘅「雄英學院」,因緣際會得到偶像「歐爾麥特」嘅超強能力,於是一邊學習使用,一邊對抗壞人。除咗能力設定之外,堀越耕平嘅畫風相當有美漫色彩,而且動作場面分鏡出色,少有「睇唔明做緊咩」嘅時候。

第五位 《Hunter x Hunter》

我諗都唔使講啲咩架啦,念能力系統、訓練方法,「貪婪之島」嘅卡片能力,複雜到真係會睇唔明嘅計謀,大到肯定佢收唔到科嘅世界觀,《Hunter》就設定黎講一定係極級之作。最大問題得一個,就係係富奸唔畫囉。 

第四位 《網球王子》

你冇睇錯,我冇錯打,名義上係網球漫畫嘅《網球王子》進佔「能力格鬥」漫畫排行榜嘅第四位!雖然我估計係日本網民刻意嘅嘲諷,但打網球打到山崩地裂、血花四濺,啲角色仲識變超級撒亞人,咁好明確網球就只係晃子,殺人先係你哋嘅真正目的啦。

第三位 《JoJo的奇妙冒險》

個人認為係同《北斗之拳》一脈相承嘅作品,畫風同樣粗獷誇張,人物肢體扭動不合常理,但唔知點解又有一種獨特嘅「美」。戰鬥風格初期比較簡單,但仍有「波紋」、「柱之男」等能力,後來引入「替身」系統之後百花齊放,每一個角色嘅替身都有各自嘅特色,而非單純力量嘅比併。於是先有一場又一場嘅精彩對決。

第二位 《One Piece》

作為史上最高銷量嘅漫畫,相信都唔使我多作解釋。果實能力又係一個獨特嘅設定,單純得黎又多姿多彩。而且睇得出尾田刻意限制主角等人們嘅能力「升值」幅度,雖然都係越到後期越誇張,但起碼有過程有解釋。個人認為美中不足嘅係尾田成日都想喺一格入面塞太多嘢,有時都真係幾亂。

第一位 《龍珠》

毫無疑問嘅「能力戰鬥」大作。Goo特別提到《Z》之前嘅劇情,以齊天大聖為藍本嘅悟空、天津飯嘅「舞空術」、餃子嘅超能力、龜仙人嘅「龜波氣功」,全部都係充滿特色嘅能力。但佢亦講到後半部份「能力通漲太嚴重」,令到對抗性減弱。

以上就係日本網民選出黎嘅十大少年Jump「能力格鬥」漫畫,你心目中又有邊啲作品應該要上榜呢?
GOO
「真愛伴侶」會令你覺得自己好好;「控制狂」會令你覺得好有罪惡感
gags
插圖話你知 何謂「真愛」何謂「控制」
20 Oct 2017
莫講話女人,可能連男士們自己都解釋唔到,有時又唔係痕,又唔係角度唔啱,點解都仲係要伸手入褲RR隻雞雞佢呢?
gags
解開謎題︰點解男人得閒無事就R丁丁?
20 Oct 2017