{ SKIP }
文:MenClub Mean娜  圖:互聯網
POSTED ON 16 Nov 2017

香港地少人多寸土尺金(係,係寸土尺金唔係尺土寸金),有幾多人真係可以順順利利上車結婚?大部分香港人結婚後都要住返娘家,要老婆同老母迫埋同一屋簷下,雖則話大家都係女人,應該有啲話題傾吓,但喺家嫂同奶奶嘅關係上,幾乎係冇「傾得埋」呢三隻字,世世代代有幾多婆媳糾紛一直未解決!就算作為仔仔嘅你深感自己老母好仁慈好易話為,自己老婆又好賢良淑德唔頂嘴,但老母同老婆一碰頭,就硬係火星撞地球咁,究竟點解會咁?!

台灣PTT嘅WomenTalk版上,就有位網友QBby向男士做個測試,要男士們將心比己,假如有朝一日,你哋要同岳父岳母住,又接受到以下幾多情況呢?玩完呢個測試,可能你哋就會明白點解老婆會咁唔想同奶奶一齊住。





你接受同岳父岳母同住嗎?

你接受岳父岳母三日唔埋兩日就同你講︰「做人女婿就要識做,屋企地板污糟要掃、啲衫滿咗就要洗,女婿同仔係唔一樣架。」

你接受新屋企嘅生活習慣同你原先嘅完全唔同,但你都要去配合佢哋屋企嗎?

你接受大家都食飽飯喺度休息,得你要幫手收拾碗筷、去洗碗同切水果嗎?

你接受見到岳母做家務時冇即刻幫手,你老婆、姨仔、舅仔事後仲要話:「你見到阿媽忙緊做咩唔幫手?」嗎?

你接受唔可以淨係著底褲喺屋企走來走去嗎?

你接受老婆周不時向你轉述:「阿媽話你每次放假都瞓到咁晏。」嗎?

你接受聽到岳母話:「身為男人就係要將屋企嘅事處理好,咁樣老婆返嚟先安心!」嗎?

你接受聽到岳母話:「老婆返工好辛苦架,你要煮XXX畀佢食!你點做人老公架?!」嗎?

你接受聽到岳母話:「底衫褲要用手洗、襪要要手洗、白色衫要手洗,我教緊你你知唔知呀?」嗎?

你接受掛住爸爸媽媽時,岳父岳母或者你老婆會話︰「做咩成日要返阿爸阿媽屋企?你喺度好唔開心咩?」

你接受好多人會話︰「點解仲唔生小朋友?係唔係你精蟲太少呀?」

你接受岳父岳母會話:「做人老公成日都出去,由朝到晚都要應酬,邊似樣架?」

你接受每日返工攰到死,都仲要喺客廳陪岳父岳母傾偈應酬嗎?

你接受就算唔鍾意岳父岳母嘅做法或者習慣,老婆都只會話:「我阿爸阿媽好好架,一定有啲咩誤會。」

你接受要過以上嘅生活幾十年,直到岳父岳母死亡嗎?


老老竇竇,手背又係肉,手掌又係肉,講真,婆媳糾紛嘅問題幫得邊個丫?不過,起碼大家睇完阿網友List嘅情況,會唔會對老婆多返少少同理心,等佢下次再呻時,就算解決唔到問題都多啲耐心聽佢講,等佢心情好啲丫。
聽聞呢次原畫展《JOJO冒険の波紋》除咗展出已公開嘅JOJO原畫之外,仲有好多全新畫作!嚟緊去日本嘅JOJO迷萬勿錯過呀!
gags
繼「手塚治虫」後再創歷史 「荒木飛呂彥」於日本國立美術館舉辦個展 ...
15 Dec 2017
最近寵物小精靈嘅官方網站就出咗「超大型比卡超尾巴攬枕」,萌度爆晒燈,啱晒鍾意比卡超嘅你呀!
gags
靠比卡超給予溫暖 單身漢必備攬枕
14 Dec 2017