- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
「點解入黑社會? 巴閉law,英雄主義,疊馬。我唔妥你,可以逗你;我唔鐘意你 可以dup你…」呢一番發人深省嘅說話大家相信都仲記憶尤新,亦都道出好多古惑仔加入黑社會嘅心態。不過黎到2014年,Dup人嘅未必係古惑仔,黑社會亦都未必好巴閉-起碼作為全球最大犯罪組織嘅日本「山口組」就唔係咁諗啦。 | |
講起日本黑道,大家可能會諗武士道、諗起切腹、諗起歌舞妓町甚至諗起《人中之龍》,但你萬萬諗唔到原來山口組有網站,而且仲係一個充滿陽光氣色、花花草草、兼且宣揚「毒品禍害」嘅網站黎添! | |
「下?黑社會教人遠離毒品,咁咪即係Tree Gun教人咩係串流?」咁你就唔啱啦,因為就同Tree Gun不遺餘力咁為人民帶來歡笑,山口組對於防止日本青年濫藥(準確啲黎講係濫用安非他命)一樣都係咁不遺餘力。由1931年安非他命傳入日本開始,日本人民就將其應用下至醫治低血壓、上至激勵敢死隊的各個層面。二次大戰結束之後,大量軍隊用剩的安非他命進入民間市場甚至被用作舒緩疲勞嘅方法,導致社會不穩及多宗罪案。 當時的山口組組長田岡一雄就成立了「麻薬追放国土浄化同盟」,組中有濫藥的成員一概逐走;販賣毒品更加被視為比經營妓院、賭場和敲詐勒索更加惡劣的罪行。他們認為毒品會傷害人民、濫藥者亦會傾向變得暴力,更嚴重的是會令日本國力變弱;賣藥就更加違反「極道」的中心思想。 | |
而呢個一入去就見到「麻薬追放国土浄化同盟」十個大字嘅網站,表面上就係由呢個背景而衍生出黎嘅產物。唔好睇佢個Design好似我哋中學整嘅電腦堂功課充滿陽春味,佢可是2014年新鮮熱辣出爐嘅新產物。入面除咗有「同盟」嘅歷史背景,仲有山口組多年來參與「公益活動」(包括2011年的日本大地震)的圖片,仲未算,佢仲有主題曲添呀佢! | |
咁究竟點解好地地山口組會整咁大壇嘢出黎呢?根據日本警方公佈的數字顯示,直至2010年為止,日本黑道人數大約維持在八萬人左右。但近年警方的「反黑」動作加強,四年間整個黑道人數降至六萬人,其中佔據最大人口的山口組人數更加從四萬人降至二萬五千多人,跌幅接近四成,可謂面臨經營危機。雖然話「做人冇公關,食屎架嘛!」,但呢個以「反毒」為門面、「公益」為調味的網站究竟係咪山口組希望吸納新血的第一步,相信只有組內的幹部先會知。我呢,就仲想去日本旅行嘅,所以就唔估落去啦。 |