星爺有云︰「做人如果無夢想，同條鹹魚有咩分別呀？」係！做人要有夢想，就算喺香港呢個彈丸之地，都仲有好多人充滿夢想！但如果一直得個諗字，唔付諸實行，一切都只係個夢，想下就算啦你，一日唔做嘢，你個夢一日都唔會成真架！

「喂！唔係喎，我未開始啫，但我唔係9諗，我係認真諗有咩方法可以令我dream come true架～」既然你咁講，姑且就信住先，不過巴西企業家Bel Pesce就話你知，如果你有以下嘅想法，你嘅夢想一定唔會實現囉～

一、以為自己可以一蹴而就
好多報導都講到成功人士嘅故事好amazing，例如突然有人賞識、突然嬴咗個大賽、突然投資中勁嘢賺大錢乜乜乜，好似個個都好好彩，突然有個機會「叮」一聲就令人成功。但大家睇完呢啲例子，往往忘記咗實現夢想過程中自己都要努力，到機會來臨時先可以好好把握，將能力發揮到極致。要知道機會係留畀有準備嘅人，一直9 fing fing等運到，你都係無法捉得住成功嘅尾巴。

二、將決定權交喺人地手上
夢想從來都係人生大事，而當我哋面對大事要作出抉擇時，往往會感到卻步，不斷詢問親朋好友，甚至係專業人士嘅意見。當然，真正為你好嘅人，會畀最真誠嘅答案你，但人人對生命嘅追求都唔同，有人愛轟烈，有人愛平淡，但記住人哋還人哋，你還你，夢想嘅決定權在你手，唔好將決定權交畀對方，一來未來你將要作出更多決定，二來自己揀嘅路自己係最心服口服。

三、滿足於一時嘅順境
人生在世總會浮浮沉沉，失意時要奮鬥，但即使順境時候，都唔可以滿足於現狀，而疏於繼續努力向上。假如有少許成功就得志，就會喪失開創另一高峰嘅機會，到面對逆境時，亦好容易被打沉，一蹶不振。

四、將錯誤都怪罪於人
如果你覺得實現夢想嘅路重重困難，埋怨別人冇眼光、埋怨別人冇才能、埋怨別人冇遠見blah blah blah，而冇反思過你本身有冇問題，咁你好難去實現夢想，因為你作為自己夢想嘅主人，將其實現係你嘅責任，而唔係人哋嘅責任。

http://www.ted.com/talks/bel_pesce_5_ways_to_kill_your_dreams?language=zh-tw#t-313724