唔係飛機杯飲得嘅Tenga登場！

文：MenClub 魏文青　　
POSTED ON 14 Nov 2016

相信所有男人都知Tenga係出飛機杯嘅，所以當你見到佢呢包最新產品嘅時候，你係咪都以為佢係新款飛機杯黎呢？對唔住，佢呢包唔單止唔係飛機杯，甚至唔係比你用上身，而係比你用黎飲嘅！因為佢係Tenga史上第一款能量飲品！叫「Tenga Men's Charge」！！

呢包「Tenga Men's Charge」嘅真正商品名稱叫「清涼飲料水」，但實情佢唔係「水」，而係一Pat淡黃色嘅疑似啫喱狀物體黎。成份方面有大量你睇完都唔知係咩嘅嘢，但其中一種「動植物混合物中」就赫然見到「蟻」、「海蛇」同「馬之心臟」，淨係睇到呢三種材料都覺得補呀真係！不過要注意嘅係Tenga冇講明呢包嘢係「壯陽用」，所以準確啲黎講佢應該係「保力達蠻牛」或者「Red Bull」之類嘅能量產品。

日本網民コジマ就已經為大家親身試過，話味道係非常濃烈嘅中藥味，入口有啲辣，而且並不如聲稱一樣「易入口」。但係飲完好快就見效，全身暖笠笠，充滿生命力！一包40g賣352Yen，即係25蚊到，買定啲返黎傍下身都好喎。