銅鑼灣SOGO 超市翻新日牌食店大混戰

文：MenClub William
POSTED ON 24 Apr 2017

前排銅鑼灣SOGO地下個超市翻新，係咁易封咗一排姐，已經好似話影響到港島區內愛行超市嘅港女港太嘅生活。上星期五完成翻新，總共就有廿多個食肆和專櫃開業，當中不乏首次來港嘅品牌，好似東京法式鹹批Quiche Yoroizuka、之前介紹過嘅鹿兒島魚餅玖子貴、日本茶專門店chagama同日本蜂蜜杉養蜂園，多新店到好似日本食牌大混戰咁，不過混戰還混戰，當中仲有幾間好值得重點推介，我就係咁易介紹下。


Quiche Yoroizuka 首先要介紹下係呢間法式鹹批，主廚鎧塚俊彦來頭超猛，曾於歐洲各地學師8年，更獲邀擔任比利時米芝蓮三星餐廳的首席甜品師傅，屬日本首屈一指嘅甜品師傅代表之一。上一年內迅速喺日本開設咗3間分店，今次來港設店，仲係Quiche第一間海外分店。Quiche Yoroizuka嘅法式鹹批，香港首見，外型吸引，色彩繽紛，揉合法式和日式的細緻和精巧，仲有推出香港專屬嘅口味，相當值得試。

Kobe Beef Meat Pie 去大阪買手信，好大機會買Juchheim 嘅年輪蛋糕，不過佢旗下仲有個好勁嘅品牌，Kobe Beef Meat Pie，係 Juchheim 嘅隱藏品牌神戸牛肉批專門店，喺日本美食界相當有名，甚至當時日本皇室成員都鍾意食。師傅為了突顯出「KOBE」神戸呢個地方品牌，將牛肉批食譜改良，選用了神戸牛肉。外層是酥皮的神戶牛肉批，內藏美味可口的免治神戶牛及粒粒洋葱，無論酥皮定內餡都係一等一，好高質，而且價錢唔算貴，你去食批&撻都要廿幾啦。

玖子貴上次已經介紹過，呢間鹿兒島名店「玖子貴」，魚餅嘅款式除咗多，仲不時研發新口味，例如明太子醬小丸魚餅、北海道粟米魚餅同曾經拎過鹿兒島縣地域特產品大賽第一名嘅流心蛋魚餅。今次食到實物都無令我失望，唔小心食到個葱味魚餅，真係驚為天人，另外仲有流心蛋魚餅，有魚味但唔死膠，咬開就爆汁，水準高質。

Butter Butler 個logo個鬍鬚仔咁管家feel，個社長成個招牌咁走出黎，真係行過好難唔望下，不過重點應該行過就聞到嘅牛油香味。喺上年先出現嘅東京甜點「Butter Butler」，品牌概念就想用管家身份，為主人製作一系列牛油甜點（管家可唔可以係女 lol）。上年4月登陸新宿南站新地標「NEWoMan」，受到各大日本電視台及雜誌媒體訪問。要食嘅包括人氣皇牌牛油費南雪 (The Butter Financier)、焦糖白雪餡餅 (The Butter Caramel Pot) 同脆糖牛油蛋糕 (The Butter Sugar Cake)，話埋俾你知全部重牛油味，味道偏甜，不過好好食！

杉養蜂園 1946 年杉養蜂園在九州的熊本成立，至今超過 70 年。創始人杉武男以「在氣候溫暖的熊本，一年四季到處都會開花，必能出產全日本第一的蜂蜜」的決心，生產出高品質並能滿足客戶的產品。

chagama 日本靜岡係日本最大的茶葉生產地，chagama 主要售賣來自靜岡的茶產品，仲有其他日本全國生產地的茶產品，包括在日本國內也罕見的貴重茶類，例如「日本全國茶品評會最高賞」獎冠茶或各種跟富士山有關的茶等等。不過上面嘅大公司更勁，係一間在1877 年成立，位於靜岡的日本茶製造批發商MARUMO MORI 在，今次香港店是第二家店鋪，也是其海外第一間國外店！
不過9成99999呢一個月都會多人到笑，男士們想食都係避下風頭先，下個月先去穩陣。