法國人真係好鍾意搞排名，之前Le Chef 整咗個世界最佳廚師100大，今次輪到排餐廳，不過規模超巨型，名單內多達1000間遍佈世界各地的餐廳。如果Chef Le Mon自己有餐廳，照計都上到榜啦可？

法國LA LISTE，每年都選出1000間餐廳作排名，方法就是將超過300本美食指南或出版物，例如米芝蓮、Trip Advisor等，整合有關餐廳的資料，為每間餐廳打分（ 0 - 100 ），之後再找來數千名餐廳主廚按美食指南的「可信程度」評分，最後，仲要睇埋網上食客的意見，佔成個系統的25%。

今年頭十名美國、法國、西班牙、日本平分春色，紐約 La Bernardin、Eleven Madison Park、銀座久兵衛等等位列米芝蓮的星級餐廳各有出現。法國名廚Guy Savoy大名真係唔使多講，已經連續兩年雄霸榜首，法國廚藝界德高望重之一人，或者你唔知，其實英國痴線佬名廚Gordon Ramsay都稱呼Guy Savoy係佢師父。

不過就咁，有人就話呢個排名專登同 "World 50 Best Restaurants" 對著幹，原因法廚Guy Savoy 有一年竟然意外跌出World 50 Best，同屬自己人的LA LISTE，就連續幾年放Guy Savoy 入頭幾位，襯返自己友咁計。老實以Guy Savoy眾所週知的殿堂地位，仲需要奬項証明咩！