年始年末，飲食界的各個單位自然會總結一年過去，然後預測新一年的飲食潮流，好似美國的食品公司WholeFood年尾一定出個流行食物預測。本地亦有同類分析出現，「貼地」得多，最近Uber Eats 就透過數據分析，最新推出 2018年「潮食趨勢」，推算出「茶」將成為本年第一位的潮食焦點。

是次推出的「潮食趨勢」預測的方法是咁的：根據過去六個月，本港用戶於平台點餐時最受歡迎的食物和食材，透過數據分析而推算出 2018 年美食潮流。先睇睇個排名：

1. 茶

2. 美食碗

3. 餃子

4. 泡菜

5. 豆腐

6. 越南河粉

7. 椰子

8. 壽司

9. 松露

10. 雞飯

11. 紫菜

12. 韓式拌飯

13. 多士

14. 牛油果

15. 拉麵

16. 沙爹

17. 紫薯

18. 泰式炒金邊粉

19. 咖哩角

20. 糙米飯

一講起茶，我就諗到港女們最愛的抹茶，前年由中村藤吉開始，宇治園、辻利、清水一芳園等多間日本老字號相繼登陸 ，你就知道「茶」的一角已具備如此威力，再者日常飲用，或以茶入饌，最常見就是甜品，香港人有幾愛「茶」的甜品？不用解釋吧？

中國人食飯自然有碗，不過名單上的「美食碗」(food bowls) ，就唔單止講緊鋪滿豐滿海鮮的丼飯、魚生飯、牛肉飯，亦可以是沙律、麵食、乳酪杯，最緊要是ig able，一個top shot，影到靚相，自然就紅啦，順帶一提food bowls在外國流行不減，即使近年出現睇到層次的玻璃樽沙律 （in a jar）風潮，food bowls依然強勢。

再睇埋其他食物，普遍都是亞洲的食品，當中更出現極邪惡級的紫薯，我卻有點奇怪，Pizza的位置到底去了哪裏？