年糕落蛋漿

就咁煎年糕有咩問題？即使再易潔的平底鑊遇上最實淨的椰汁年糕，都會「沾鑊」（痴底要洗好麻煩），所以基本上當你切好年糕，需要沾上蛋漿先好落鑊，咁樣先可以防止「沾鑊」。

忌用橄欖油

好多人以為用橄欖油煎蘿蔔糕，脂肪酸有助降低壞的膽固醇，感覺健康好多，但其實煎糕忌用橄欖油，因為橄欖油煙點較低，只適合使用作涼拌、小火，再者高溫會令橄欖油營養流失。新年通常都係用花生油落鍋，鍋夠熱就大火煎糕，你幾可見到屋企人用小火煎食物？

切糕要厚身

講到煎蘿蔔糕一類，最常出現的狀況就是煎到碎，要避免這個情況，由切糕做起。以個人經驗為例，我煎糕通常會將蘿蔔糕切成1.5 - 2cm的片狀。煎的時候，若果對自己筷子功無信心或你心怕糕身太軟，請果斷使用煎鏟，亦切忌多手去反，順利者成品一定靚仔。糕有厚度，食落先有口感，外脆內軟先係上品。

保存蘿蔔糕

一底蘿蔔糕，最少食三次，所以你要知道保存方法。正常來說，自家新鮮製作的蘿蔔糕，食用期頂多十日，無時無刻請放入雪櫃。到你要食啦，記得第一，切糕的刀不可沾水；第二，切好合適份量，請把剩餘部份放入雪櫃，強烈建議放入保鮮袋，再放一張廚房紙預防「倒汗水」。