旺角車房滿佈嘅橫街，有一間「豬大王」，食嘅坊間少見嘅豬雜，一碗加入豬雜同煮豬骨湯，鮮甜程度真係你意想不到。

唔知你會唔會好似我咁，細細個大把嘢唔食，最印象深刻，肯肯定係牛雜豬雜一類，老豆帶我出街食飯，柯打一碗滿佈不知名豬肉部位嘅粉麵，齊集豬肚、粉腸、豬肺、豬腰、豬潤、豬心，很容易造成「兒童成長飲食陰影」。雖則就咁，當我大個少少，就漸漸放低恐懼，亦開始發現眾人所稱的「下欄嘢」其實好好食。

喺呢個世代，我講「食豬雜」，你總會覺得係一件「好佬」、「好麻甩」嘅事， 連餐廳老闆毛哥自己都咁講：「豬雜都是一個好有「佬味」的食物，我們最初做生意，都以為只有中年人才會來幫襯，不過漸漸發現更多後生會試。」

餐廳在旺角新開，其實只係分店，總店卻在屯門，以炸雞翼和炸豬扒聞名，不過豬雜先係店中招牌物。

正當你以為這是真心「佬味」食物，豬雜都依然大把人食，甚至好多後生仔都鍾意食，老闆笑說；「其實在店中吃豬雜的客人，反而女仔多過男仔，如果以幫襯的後生仔來計，的確女仔比男仔多，不過單論男人客，那中年的大叔就比較多。可能一對男女來幫襯，男的會點豬扒，女的反而嗌豬潤、豬腰、豬肺，實在不出奇，還有粉腸，最多女仔吃的部位，就是粉腸，我完全估唔到。」

言歸正傳，所謂嘅豬雜，究竟有咩食？正常「心、肝、脾、肺、腎」都要有，不過睇睇毛哥的一碗八寶麵，只有豬肚、粉腸、豬肺、豬腰、豬潤等等，無他的，因為第一，貨源不多，毛哥自己都坦承他的豬雜並不齊全，但老實講句，你知道整豬雜到底有幾麻煩嘛？去中菜廳飲一碗豬肺湯都收你近百啦。

坊間極少人做豬雜，最大原因就是處理內臟尤其麻煩，不同部位，不同處理手法，例如豬肺，「啤」水都要做足一個鐘，這樣做才會乾淨，再經烚和燜煮，才會顯得「白雪雪」；而豬脷本身有一陣「衣」，質地相當韌，必須要用熱水烚過，再慢慢用刀刮乾淨，相當「晒心機」； 至於口感特別的粉腸，老闆擔心它有苦味，先剪走肥膏，再從中間劏開，看看有沒有黃色的膽汁，如果沒有就可以拿去炆，因為如果發現腸中有膽汁，就要成條都扔掉，不是只扔掉一段。

眼見毛哥一心做豬雜，每日一早花數小時清理和製作，為的就是各個豬雜部位不同的口感，還有那一口超絕鮮甜的湯頭。

用豬雜煮過嘅湯點解特別甜 ？

毛哥解釋：「一般內臟本身有一種『味』，如果處理得不乾淨，不單做不出鮮甜的味道，反而變成一種臭餲味。我把內臟洗得乾淨，加上用白滷水去炆，效果自然不同，再加上我煲的老火湯，煲的時間長，火力又夠，煲到連骨都溶化，便會出現奶白色的效果，成件事都會變得好鮮甜。」

就講出品，一碗「八寶湯飯」，也可以轉粉麵，配料就有豬肚、粉腸、豬肺、豬腰、豬潤、肉片和豬肉丸，湯飯份量似面盤，湯頭呈奶白狀，豬骨味香濃，的而且確比想像中鮮甜，豬肚爽勁，粉腸韌中帶粉、豬肺軟滑、豬腰實淨無餲味、豬潤厚度適中，飲勻一轉再次入湯頭

「見到客人在食我的食物，忍不住和我講：『老闆你整的豬雜好好食。』也有客人見到間面我無生意，都繼續入內支持我，我其實是很開心，我整的豬雜是好食的，是自己的工夫達到效果，客人認同，最開心就是這樣。」

豬大王

地址：旺角黑布街99號昌明大廈地下C號舖