【隔涉．路遠．但唔隱世】雜貨店堅抵食靚扒

文：MenClub William 圖：MenClub
POSTED ON 20 Dec 2016

好老實，香港豆潤咁細，俾你搵到都唔算隱世啦，呢間喺跑馬地嘅高級雜貨店，位置隔涉，但賣嘅全部都係過節必備嘅高級食材，啤酒麵包、肉類製品、法國芝士，尤其空運到港嘅澳洲牛扒，自己入貨，價錢夠公道，係一呢個樣樣都要精打細算嘅年代，臨近節日想話買定食物過節，真心推薦你黎行一轉。

如果我話為左「齋買」幾件平幾十嘅靚扒而叫你走入跑馬地，你應該會想殺咗我。叫得你入黎，除咗有得買，當然仲有得食。介紹返呢間Feather & Bone，走高級精品路線嘅雜貨店，一站式買齊肉品、蔬菜、醬料、乾貨、芝士同紅酒，原先喺中環嘅鋪頭都已經好受歡迎。今次新開嘅跑馬地分店佔地2千平方呎，地方大一個dup，環境似歐陸小館，綠白配色，復古格調，仲有個露天小花園，坐底食堅開心，當然，仲多嘢賣咗啦。

店內一個重點位，就係性價比特高嘅肉品，一入門口就見到放滿由澳洲牧場直接運到精品肉類嘅凍肉櫃，好似澳洲M5和牛、100或150日草飼YG牛、美國特級安格斯牛，甚至罕見嘅法國牛肉等都有，選擇都算多元化，店內亦有自家熟作櫃，風乾熟成牛扒至少28日。想揀靚扒，Butchers即場同你處理肉品，而且整體牛扒嘅價錢平均比出面平2成，抵買。

咁坐係間餐廳有咩食？最值得推介嘅就係你可以喺凍肉櫃揀完你想食嘅肉品，即落order食埋佢，想點煎要咩汁要幾成熟，有人服侍埋但無需加錢。除此之外，餐牌上仲有Burger、Pasta、甜品等等，店內仲獨家引入獲得「World Best Cheesemonger」嘅法國得獎芝士品牌Rodolphe Le Meunier，三十幾款芝士，確實吸引到識貨嘅芝士迷。


150 days 草飼黑安格斯牛 Bone-in Ribeye $399/kg 小弟食牛，以肉味行先，草飼牛肉濃味正常都比穀飼的多。圖中的一份足4人份，約 0.88kg，大概$352，雖然連肉骨同磅，都算抵食。大廚簡單以鹽、胡椒和rosemary調味，肉味相當出，富嚼勁，骨頭也帶香。客人亦可以自行order醬汁。

Burger Pleasure $88 漢堡混合草飼牛肉和天然放養嘅走地雞肉，經煎封嘅肉扒嫩滑多汁，啖啖肉嘅口感，係食肉獸嘅恩物。

Carbonara $158 意粉識食，要食配料最簡單嘅，Carbonara 簡單用煙肉、牛奶同蛋黃製作，相當「杰身」，鹹香適中，份量頗大，足夠二人同吃。

Frenched Lamb Rack $360/kg 來自法國嘅羊鞍，入口超軟身，羊羶味不算強勁，口感嫩滑，真心好食。

Cheese Platter ＄200 一次試勻店內5款芝士（由右至左） St.Maure Goat Cheese 山羊芝士，係法國芝士界中一種經典口味，產量屬法國中最多，特點係用灰同炭製成表面嘅皺皮，奶味濃，牛油般順滑，黑松露蜜糖係點睛之作。 Ossau Iraty 綿羊芝士，半硬芝士無羶味，入口creamy，nutty，係好容易令人鍾意嘅款式。食嗰時配橘子果醬，酸度補完奶香，達至balance。 Brie De Meaux 白芝士，距離巴黎15km嘅莫城，出產嘅白芝士舉世知名，最適宜配蜂蜜、生果，軟芝士入口綿密，香氣同味道都好吸引。 Comté 硬芝士，來自東法嘅硬芝士，熟成24個月，質地實淨不死硬，nutty風味，配醃漬小黃瓜同食最好。 Gorgon Zola dolce，來自意大利嘅藍芝士，creamy得嚟輕盈，奶中帶甜，不過始終藍芝士味道強烈，唔係個個人啱食，可以配少少Tasmanian Honey，無咁重味。

Feather & Bone 地址：跑馬地黃泥涌道 11 號永勝大廈地下電話： 2836 3770 營業時間：7:00am - 10:00pm www.FeatherandBone.com.hk