【開到去美國】你仲有無食開添好運？

文：MenClub William 圖：互聯網
POSTED ON 22 Dec 2016

香港其實有唔少餐廳都有能夠揚威海外，添好運就係其中一間，當年更拎到「米芝蓮」嘅一星級評級，風頭的確一時無兩，只不過近年水準下降，服務更麻麻，港人都開始唔多buy，但添好運已經係世界各地大開分店，月頭仲喺美國紐約East Village開分店，係威水嘅，不過你仲有無幫襯？

老闆麥桂培本身係中環四季中菜龍景軒嘅點心主管，09年開咗旺角店添好運，8個月後就有「米芝蓮」評定為一星級餐廳，成為外國遊客黎香港嘅必食推介。的確造就了幾年前「點心店」嘅風潮，食點心唔再需要入茶樓，仲可以食到chic，花款都比較多。

即使個酥皮焗叉燒包味道仲keep到，連我都幾鍾意食，但網上劣評嘅內容，大部份都指向店內阿姐們嘅「親切」態度，服務係差，我都有親身感受過，不過都掩蓋唔到大開分店後食物水準大幅下降嘅事實。到今年5月，添好運更被爆出食物出現沙門氏菌，短暫打擊，不過早兩日做孝子陪屋企人食，真心發現香港客唔多，旁邊都係大陸客......

唉，話晒都香港品牌，發咗跡都照顧下香港人丫。