隨住開放世界出現，遊戲特別加強場景效果，所以今集另一特點就係加入天氣同晝夜效果，遊戲中可以去到雪原、叢林同沙漠等地型，玩家仲可以去到洛陽、虎牢關、黃河同嵩山等地方，睇圖真係整得好靚，如果in game有咁靚，相信會有好多人入去影風景相！講到地型，《無雙8》亦可以因應地型而作出新動作，有得爬山同游水之餘，仲可以用鉤繩「翻牆」，似乎將來會有潛入同突襲任務喇。

今次官方發布圖片都算多，但暫時見到嘅角色只係得關二哥、惇爺同埋趙公子。官方透露歷代至今出現過嘅83位武將都會以全新服裝亮相，先唔理有咩衫，重點係遊戲最少都會有83名角色可以玩，夠晒疊馬！至於新武將方面，除咗喺《無雙☆群星大會串》搶先登場嘅周倉之外，做咗咁多集大眾臉嘅程普亦終於擔正，會有全新造型，真係守得雲開喇。

Koei Tecmo