{ SKIP }
文:MenClub Mr.波特  圖:互聯網
POSTED ON 18 May 2017


近期,歐洲各大聯賽都開始進入最後倒數階段,其中英超車路士已經率先提前兩輪奪得冠軍,拜仁就更加早已經連續5年成為德甲聯賽冠軍,西甲就需要戰至最後一場先戰究竟係皇馬定係巴塞可以奪得聯賽冠軍。正當大部份人嘅焦點都停留係四大聯賽上嘅時候,荷甲亦有相當精彩嘅收咧日。




荷甲今季同西甲有幾分相似,兩大豪門飛燕諾同阿積士需要戰至聯賽最後一場先可以分出勝負。喺進行最後一場賽場前,飛燕諾累積有78分,而阿積士則有77分,所以只要飛燕諾能夠贏波,佢地就唔使理阿積士個邊踢成點,相反阿積士就只可以寄望飛燕諾會失分。



結果係阿積士成功以3:1擊敗對手,做左自己可以控制嘅事,但係飛燕諾就以同樣嘅比分贏波,所以飛燕諾最終都係以1分之微壓到阿積士,相隔18年後再一次奪得荷甲聯賽冠軍。


飛燕諾能夠係最後一場比賽獲勝,功臣絕對係前利物浦球員古治(Drik Kuyt),呢位如今已經退居成為球隊中場中嘅老將,係收咧戰中個人大演帽子戲法,最終為球隊鎖定勝局,收下聯賽錦標。不過,就喺球隊奪得聯賽冠軍後,飛燕諾宣佈古治將會在今夏正式掛靴,離開征戰20年嘅足球場,實在有啲令人唔捨得。



相信如果你係睇開英超嘅朋友,應該對古治唔會太陌生,雖則佢離開左英超都已經5年,但係佢嘅身影我估你都實有印象。



現年36歲嘅古治,自5歲便加入荷蘭當地一支業餘球隊Quick Boys開始訓練,直至1998年3月,他正式以球隊一隊身份上陣,為球隊進行賽季最後嘅6場比賽。而就係呢6場比賽,古治成功吸引到荷甲球隊烏德勒支的垂青,最終佢從烏德勒支身上獲得生涯首份職業球員合同。


加入烏德勒支後,古治好快就成為球隊嘅正選,但係好多時候佢都被安排出任唔係佢最熟悉嘅位置,所以佢嘅入球並無非常多,喺烏德勒支嘅頭四季,佢加埋上陣左144場比賽,但就只係入左33球。不過,一切係2002-03球季迎來轉機,因為球隊請黎一位新經理,佢安排古治喺呢一季更多出任正前鋒同進攻中場,就係咁佢全季上陣40場就入左23球,其中喺聯賽就攻入左20球,最終成為了荷甲最佳球員得主。另外,喺呢一年入面,烏德勒支更成功打入荷蘭杯決賽,雖然對手喺實力比佢地更強嘅飛燕諾,但係最終烏德勒支卻以4:1大勝對手奪得冠軍,而古治喺呢場比賽入左1球,兼且做埋決賽MVP。



就喺成功擊敗飛燕諾贏到荷蘭杯冠軍後,古治喺賽季完結後就以100萬歐元轉投飛燕諾呢支手下敗仗,後者搵古治番黎係因為佢地當時嘅射手雲賀當離隊了。



加入飛燕諾後,古治嘅入球能力並無變,喺第一季佢再次攻入20球,第二季佢就更加攻入29球,成為荷甲神射手,全季更加更入左36球咁多。


去到2006年夏天,古治同英超嘅球隊開始聯繫上,有指佢將會轉投利物浦或紐卡素。而古治本人亦公開表示,佢雖然喺飛燕諾踢球好開心,但係佢更想到英超踢球。就係咁,古治最終選擇加盟利物浦,但係佢嘅轉會費並無公開。

轉投利物浦後,古治無再交出好似喺荷甲嘅入球能力,佢最多一季就只係為球隊攻入15球。不過,喺古治效力紅軍6年期間,佢亦都有唔少精彩同重要嘅入球,其中包括喺2012年聯賽盃決賽面對卡迪夫城加時賽嘅入球,而就係呢個入球間接令利物浦贏到古治效力期間唯一一項錦標。
2012年6月,費倫巴治宣佈古治將以100萬歐元轉會費轉投呢支土耳其球隊,並雙方簽約3年。喺效力費倫巴治嘅呢3年,古治一共入左37球,並為球隊帶黎1次土超冠軍、1次土耳其盃冠軍以及1次土耳其超級盃冠軍。

2015年4月,古治決定重返荷甲的飛燕諾,佢嘅表現完全無令球隊失望,佢喺2015-16球季攻一共入左23球,而黎到今季,佢最終成功帶領球隊奪得了荷甲冠軍,而呢個亦都係佢生涯首個荷甲冠軍。

19年職業生涯,古治一共參加左798場比賽,攻入左295球。
國家隊方面,古治喺2004年9月首次入選荷蘭國家隊,之後一共上陣104場攻入24球,成績最好嘅一次就係2010年世界盃,佢地成功奪得賽事亞軍,而係2014年世界盃佢地就奪得季軍。

對於唔少人黎講,古治嘅職業生涯唔算得上驚為天人,但係可以到世界最頂級嘅聯賽效力多年,其後重返飛燕諾喺生涯最後一年奪得聯賽冠軍,都真係死而無憾了。


古治生涯精華片段

巴塞隆拿係歐洲足球豪門之一,而對上10年呢支西甲班霸亦踢出獨有嘅足球,繼而被世人稱之為「地上最強」,可想而知佢地究竟有幾強大。但其實早喺90年代,巴塞已經喺西甲取得驚人嘅成績,而當時每一個時期嘅巴塞都有一 ...
hobby
【新舊交替】巴塞隆拿的巨星更換過程
23 Jun 2017
少見嘅戰損版!
hobby
GX-70D 超合金魂戰損萬能俠
23 Jun 2017