【傳奇球員】球場藝術家－施丹

文：MenClub Mr.波特　　圖：互聯網
POSTED ON 24 May 2017


「拖舟」，阿唔係，應該係施丹先岩，相信無論有無睇過呢位球員踢波嘅球迷，都一定識得佢，因為球員時代嘅佢華麗無比，而退役後做左教練就實而不華，宜家有機會帶領佢嘅球隊挑戰衛冕歐聯冠軍。

44歲嘅施丹宜家係西甲班霸皇馬嘅領隊，佢喺2016年1月接手皇馬呢個燙手山芋，而當時嘅佢係首次成為一支球隊嘅真正教練(之前佢只係皇馬預備組的教練)，點知佢竟然成功帶領皇馬拎到歐聯冠軍。

可能當時以教練身份拎到歐聯冠軍嘅施丹都係未得到外甲一致嘅肯定，但係黎到今季就真係佢一手一腳帶領嘅時候。而施丹亦無令皇馬失望，佢成功喺西甲收咧日為皇馬帶來相隔5年嘅聯賽冠軍，而同時佢又帶領皇馬連績第二年殺入歐聯決賽，令佢地有機會實現歐聯衛冕呢個壯舉。

可以話施丹喺教練生涯不足兩年時間已經取得巨大嘅成功，不過球員時代嘅佢就更加輝煌啦。

施丹出生自法國馬賽，自10歲起開始進入當地的足球隊展開青訓。直至1986年以13歲之加入康城，之後訓練左3年就以16歲為康城一隊上陣。當然，就算成為左一隊成員，施丹亦無咁快可以展露實力，佢頭兩季只係為球隊上陣左兩場賽事。

直到1990-91球季，施丹終於獲得更多嘅上陣機會，佢全季上陣左31場賽事，雖然只係收獲1個入球，但係佢喺場上展現出嘅足球技術已經令唔少人震驚，認為他未來必定是世界最出色的球員之一。

康城呢支球隊當然無可能留得住施丹呢位明日之星，所以1992年夏天呢位中場就轉投到法甲強隊波爾多。黎到波爾多嘅第一季，施丹已經完全融入球隊，佢全季上陣39場，一共攻入11球，其中喺聯賽攻入左10球，但係值得一提嘅係當時嘅佢只有21歲，但佢嘅踢法已經相當成熟。

當時施丹嘅實力已經喺歐洲相當出名，所以有傳唔少英超球隊都對佢有興趣，其中波爾多曾向紐卡素推介施丹，睇下佢地有無興趣以120萬鎊收購呢位中場。不過當睇完佢嘅比賽後，紐卡素竟然覺得施丹無能力喺英超頂級聯賽踢波。對於紐卡素今次錯失施丹嘅眼光，真係可以用唔識貨黎形容。最終，施丹無轉去英超踢波，而繼續番喺法甲嘅佢，就喺1996年當選為法甲最佳球員。

1996年夏天，施丹終於登陸歐洲四大聯賽，佢由波爾多轉投意甲豪門祖雲達斯，轉會費為350萬歐元。加入祖記後，施丹立刻起到巨大嘅作用，佢嘅個人技術加上出色的助攻能力，令祖記喺意甲所向披靡，最終連奪1996-97及1997-98球季嘅聯賽冠軍。

而喺1998年，可以話係施丹球員生涯嘅巔峰，因為佢以核心身份帶領法國隊喺世界盃殺入決賽，並且喺決賽以3：0完勝強敵巴西，為法國帶來歷史上首座世界盃冠軍，並最終喺年尾首次奪得金球獎以及當選為世界足球先生，以上呢啲榮譽都將施丹推舉為法國的一代球王。

2001年，施丹以當時破世界紀錄的7750萬歐元轉投西甲班霸皇馬。而加盟第一季，施丹已經交出球王級嘅表現，特別係喺歐聯決賽上以左腳窩利射入世界波，為皇馬相隔兩年後再次奪得歐聯冠軍，並成為決賽的最有價值球員。喺皇馬效力5個球季，施丹喺2003年再次當選世界足球先生，並曾經與多位球星組成6條A，成為足球界的一段神話。

2006年，施丹喺完成與皇馬嘅合同後，決定正式退役，當時嘅佢就只係34歲而已。

整個職業生涯，施丹都無非常多嘅入球，但係佢喺場上嘅每舉手一投足都係咁令人如痴如醉，佢唔似「細哨」朗拿甸奴咁花巧，又唔似巔峰嘅C朗拿度以速度過人，但係佢就係充滿住法國一般嘅藝術感，以純技術過掉人，所以被人稱為「球場藝術家」。

令Mr.波特我印象最深嘅係，施丹2006年喺世界盃面對巴西嘅比賽，佢嘅個人控球技術好似已經達到化境，基本上巴西嘅球員係完全搶唔到佢個波，唔知你仲記唔記得呢？

作為法國歷史最佳球員，施丹離開球場後，開始投身教練工作，最終喺2014年重返皇馬成為球隊預備組嘅教練，慢慢積累經驗後，終於在去年1月正式身為皇馬主教練，統領皇馬。如果今年歐聯決賽皇馬能夠衛冕成功，相信施丹將會可以有一段長時間穩坐皇馬領隊呢個職位了！