【再次期待】76人「大帝」- Joel Embiid

文：MenClub Mr.波特　　圖：互聯網
POSTED ON 19 Jun 2017


如果要說NBA 2016-17球季最令人期待嘅球員，相信76人中鋒Joel Embiid一定係其中之一，甚至可以話係最最最令人期待嘅球員，因為佢因傷已經休戰左足足兩年，但係76人卻仍然對佢投以信心一票，所以更加令人對佢嘅實力感到無比期待。

終於，現年23歲嘅Embiid喺今季正式登場，雖然佢喺2014年夏天進入聯盟，但係今季先係佢嘅新秀賽季。作為「新秀」，Embiid效力嘅76人實力處於聯盟墊底水平，所以基本上都無咩人會對佢地嘅成績有咩期望，特別係就算Embiid實力有幾勁，佢都係叫做岩岩傷癒復出，球迷都唔敢抱太大期望，只求佢千祈唔好再傷。

對於呢位岩岩傷癒復出嘅中鋒，76人都表現得非常謹慎，佢地喺賽季開始前已經為Embiid設置左上陣時間上限為24分鐘，即係話只有半場比賽嘅上陣時間，目的就係唔比佢過份勞損，要循序漸進以免再次觸及傷患。而Embiid第一戰主場面對擁有Russell Westbrook嘅雷霆，當時呢位中鋒出場成為全場焦點，風頭比全明星嘅Westbrook更大。最終，Embiid真係只有22分鐘嘅上陣時間，但係佢就取得20分7籃板2封阻，雖然佢16投只有6中，但係入左一球三分球，罰球又8罰7中，表現已經遠超球迷嘅想像。

好快呢位中鋒已經成為76人球迷心目中嘅新王，再加上佢係社交媒體達人，總係可以發佈言論吸引大批網友留意，成為NBA一大焦點。賽季繼績進行落去，Embiid雖然繼績被限制上陣時間，並且球隊唔比佢參加背靠背第二天嘅比賽，但係佢嘅表現依然非常出色效率極高，甚至開始被人認為係現今最強嘅中鋒之一。

喺1月份嘅時候，Embiid一共上陣左9場比賽，而當時佢亦已經被球隊解鎖左一點點上陣時間，場均上陣時間提升至26.7分鐘，而佢呢個月平均可以取得23.4分9.1籃板2.8助攻2.6封阻1.1抄截，Embiid係咁嘅上陣時間可以交出咁嘅數據，實在係非常非常驚人的，所以當時基本上佢都鎖定左年度最佳新秀嘅獎項。可惜嘅係，喺1月20號面對拓荒者嘅比賽入面，Embiid不幸完成入樽落地時膝蓋受傷，雖然休戰三場後成功復出並交出32分，但係最終76人都係決定要佢賽季報銷，不要加重傷勢，就係咁佢呢個新秀賽季就係1月底嘅時候完結。

Embiid雖然喺新秀賽季入面上陣機會唔算好多，但係佢嘅表現已經得到各界肯定，甚至揚言佢會喺未來成為傳奇級別嘅中鋒，可見佢散發出嘅實力同潛力有幾誇張。就係短短31場比賽，場均只有25.4分鐘嘅情況下，大家都已經被佢俘擄左，咁如果佢真係可以全面解封，喺比賽入面唔再受限利，佢究竟會變得有幾恐佈？

2017-18 NBA新球季，76人將再一次令唔少球迷充滿期等，其中如果Embiid能夠進一步解封，甚至全面解封，咁76人嘅戰力將會大幅提升，預計到時呢位中鋒將可以場均至少達到30分，而佢為76人帶黎嘅護框能力亦會進一步提升。不過前提係Embiid一定要保持健康，否則一切都只係空講。

除左Embiid，2016年選秀狀元Ben Simmons亦都會喺新球季傷癒復出，Embiid加上Simmons呢對組合球迷們已經等左一整年，佢地究竟可以帶領76人達到咩高度實在非常令人期待。除左以上兩位球員，76人今年夏天仲有一個探花簽，佢地又可以簽到一位出色嘅新秀，其中目前前三順位有可能被76人選中嘅準新秀有：Markelle Fultz、Lonzo Ball及Josh Jackson，其中前兩人都係控衛，係76人一直所需嘅人才，而即係Jackson亦都可以大幅提升球隊小前鋒位置嘅實力。

除左選秀，76人今夏仲可以透過自由球員市場引入球星，其中黎自速龍嘅控衛Kyle Lowry傳聞好大機會加盟，咁樣76人隨時可以組成Lowry+Simmons+Embiid+探花嘅組合，雖然未必可以挑戰總冠軍，但係要助76人重返季後賽亦絕對唔係夢。不過無論點都好，76人亦都會以Embiid及Simmons作為核心來建隊的，如果佢地可以一直留喺陣中，未來76人真係有機會挑戰總冠軍的！