{ SKIP }
文:MenClub Mr.波特  圖:互聯網
POSTED ON 19 Jun 2017


今年皇馬絕對係最成功嘅球隊,因為佢地除左成功喺西甲壓倒巴塞隆拿奪得聯賽冠軍,之後又喺歐聯擊敗祖雲達斯,歷史性地完成歐聯衛冕。而要數皇馬能夠取得巨大成功嘅原因,隊中首席球員C朗拿度絕對係當中嘅第一功臣,佢全季一共攻入42球,雖然相比前6季都明顯減產左,但係就仍然係隊中嘅首席射手。



可惜嘅係,C朗喺皇馬又或者可以話係喺西班牙過得並唔開心,特別係近期佢被捲入逃稅風波中。因此,最近就有消息指C朗有意離開皇馬,而佢嘅前東家曼聯就非常有興趣,希望可以將呢位巨星重新帶回奧脫福球場。就目前為止,有關C朗轉會嘅消息都仲未好肯定,不過足球世界真係咩都有可能。


皇馬領隊施丹希望能夠留住C朗,但係已經喺皇馬贏得一切嘅佢就可能對呢個地方已經少左一份留戀,因為佢覺得西班牙嘅媒體太恐佈,佢覺得自己宜家喺西班牙受到稅務部門迫害咁,而同時皇馬又缺少左對佢有足夠嘅保護,所以佢對皇馬嘅心已經一點一點咁流走。



另外,有消息指皇馬已經對C朗有一個心目中嘅價錢,如果有任何球隊願意為佢開出1.31億鎊轉會費,就可以帶呢位巨星離開班拿貝球場。


當然,曼聯絕對係C朗嘅首選,佢對紅魔有一份情意結,再加上目前曼聯領隊摩連奴亦都係C朗嘅熟人,呢位牙擦教練曾經執掌過皇馬,亦同時又係C朗葡萄牙嘅同胞,所以雙方嘅感情應該都算唔錯的。



不過,曼聯亦都唔係坐定粒六,因為C朗係唔少球隊爭相希望羅致嘅對象,其中包括今季英超冠軍車路士,佢地絕對可以搵C朗黎取代可能離隊嘅迪亞高哥斯達。除此之外,法甲嘅巴黎聖日耳門同埋德甲巨人拜仁慕尼黑亦都係C朗可以考慮加盟嘅球隊。究竟最終C朗會唔會再次披起紅魔嘅球衣呢?球迷們拭目以待吧!






討論NBA球星邊個更加偉大一直係球迷最喜歡嘅話題之一,如果要講NBA歷史最大嘅球員,我諗支持者最多嘅應該就係6次奪得總冠軍及6次成為總決賽MVP嘅「籃球之神」Michael Jordan,呢個答案亦都必定係最多人順服嘅答案。 ...
hobby
【誰更偉大?】Kobe Bryant vs LeBron James
21 Aug 2017
表層噴上名為「Vitrik」嘅特殊物料,保護玻璃之餘仲有布料嘅磨擦力!
hobby
倚天Cue都篤唔爆 X1 Everest玻璃波枱
21 Aug 2017