【傳奇球員】捷克鐵人 - 利維特

文：MenClub Mr.波特　　圖：互聯網
POSTED ON 29 Jun 2017


如果要數捷克最佳球員，可能唔少球迷都會第一時間諗起阿仙奴門將施治，當然施治絕對係捷克嘅傳奇級球員，但係喺佢之前就仲有一位球員比佢更加傳奇，佢就係中場「鐵人」利維特啦(Pavel Nedved)！

現年44歲嘅利維特可能對於較為年輕嘅球迷可能無咁熟悉，因為佢並唔係去到球王級別，所以無朗拿甸奴、李華度、施丹呢啲中場大師咁受歡迎，不過佢依然係FIFA 100入面，兩位入選嘅捷克球員中嘅其中一位，所以佢對於捷克足球黎講絕對係一個傳奇嘅存在。

利維特司職進攻中場式中場邊路，佢擁有強勁嘅腳頭，能夠從禁區外施放冷箭，但佢並無好似施丹同朗拿甸奴嘅超級腳法，所以佢並唔算得上係一位腳法秀麗嘅球員，但係咁樣並唔代表佢無技術，相反佢往往能夠提供高效嘅表現，唔會因為上腳而影響球隊嘅進攻流動。另外，利維特被稱為「鐵人」當然係因為佢擁有永遠用唔完嘅氣力，作為進攻中場嘅佢經常都會協防，令球隊嘅防守力唔會因為佢只係進攻球員而減低。

又講番佢嘅球員生涯歷史時，1972年出世嘅利維特，喺5歲已經開始喺捷克本地展開足球訓練，期間佢又曾經轉投唔同嘅球隊繼續進行青訓，直至1990年正式進入捷克著名球隊布拉格Dukla。短短喺Dukla一年後利維特就正式進入一隊，當時19歲嘅佢全季一共上陣左19場比賽攻入3球。

短短效力Dukla一年後，利維特就轉投捷克國內嘅強隊之一布拉格斯巴達，但係又於佢踢法兇悍，所以佢上陣6場已經3次被驅逐離場。而喺球隊效力4年期間，利維特一共為球隊帶黎3個聯賽冠軍以及1次捷克盃冠軍。另外，喺1994年利維特亦首次入選捷克國家隊，正式展開佢為國效力嘅生涯。

1996年夏天，由於利維特表現出色，助捷克國家隊奪得歐洲國家盃亞軍，因此被意甲球隊拉素相中，並隨即加入，雙方一簽就係4年合同。黎到拉素，利維特一開始都並未完全融入球隊，全季上陣35場攻入9球，而球隊只能以第4名完成聯賽。不過黎到第二季，利維特就開始展示佢嘅實力，並且帶領球隊由1997年11月至1998年4月期間連續24場不敗，最終呢一季拉素成功奪得意大利盃冠軍，而喺歐洲足協盃亦成功殺入決賽。

而喺拉素最成功嘅一季，相信就係1999-2000年球季，因為球隊最終以1分之微擊敗祖雲達斯，奪得意甲聯賽冠軍，而利維特喺呢一季就上陣左41場比賽攻入6球。2001年4月，利維特同拉素完成續約4年，但球隊卻有意將佢同埋另一中場華朗一齊出售，而最終兩位球員都真係一齊被賣走，導致拉素球迷出現大規模反對，並同球會主席出現決裂。

利維特最終以4100萬歐元轉會費轉投意甲班霸祖雲達斯，而佢嘅身份就係取代離隊轉投皇馬嘅法國球王施丹。雖然有施丹呢位巨人在前，但係利維特嘅表現亦都無令祖記嘅球迷失望，佢成功助球隊相隔4年後再次奪得意甲聯賽冠軍，並且又帶領祖記相隔7年後奪得意大利盃冠軍，實現本土雙冠王。

2002-03球季，利維特繼績擔任球隊核心角色，再一次佢協助球隊奪得意甲聯賽冠軍，而今一季佢更帶領球隊殺入歐聯決賽會師AC米蘭。但好可惜，利維特喺4強面對皇馬時累計獲得第二面黃牌，所以喺決賽入面無法上陣，最終失去核心嘅祖記喺決賽入面同米蘭大戰120分鐘後需以12碼決勝負，但係結果祖記卻落敗而回。

憑住02-03球季出色嘅表現，利維特成功喺2003年擊敗亨利同埋馬甸尼奪得金球獎，係佢生涯入面嘅個人最高榮譽獎項。之後祖記因為電話門事件而被迫降班至意乙聯賽，但係利維特都無因為咁離開球隊，並且一直留效祖記至2009年宣佈退役，雖然宣佈退役，但係當時嘅利維特其實狀態仍然非常出色。利維特喺祖記效力左8個球季，一共上陣左324場比賽攻入65球，係球隊絕對嘅傳奇之一。


而喺利維特捷克國家隊入面嘅隊醫就指出，一般人嘅膝蓋骨只有一塊，大約只有百分之一嘅人，佢嘅膝蓋骨會有兩塊。但係尼維特嘅情況就更加罕見，佢竟然天生擁有三塊膝蓋骨。捷克隊醫表示，尼維特嘅膝蓋骨係由三塊小骨頭組成，可能就係因為咁，次尼維特喺球場上擁有異於常人嘅力量，其中主要就係令到佢跑得更快同埋力量更大。

退役後，利維特並無完全離開足球壇，因為佢被祖雲達斯方面邀請進入管理層，而喺2015年佢更加被任命為球隊嘅副主席，成為祖記內部一位舉重輕重嘅人物，相信近年祖記能夠有咁好嘅成績，相信利維特嘅功勞絕對唔少，唔知遲下佢會唔會做埋主席一職呢？