【速度99】退左役？馬田斯原來只有32歲兼喺中超踢緊！

文：MenClub Mr.波特　　圖：互聯網
POSTED ON 28 Jul 2017


相信提起當年打Winning嘅時候，只要講起速度99同加速99嘅球員，我諗你一定會諗起一位球員，佢就係尼日尼亞前鋒馬田斯啦。呢位當年效力國米嘅前鋒，憑住驚人嘅速度令一眾後衛只可以喺後面食塵，雖然佢嘅射門能力真係麻麻，但係如果你有技術嘅就可以扭過埋門將輕鬆射入空門。

諗番起當年打機用馬田斯都已經係10幾年前嘅事，如果你唔夠細心，宜家又唔係好留意足球界嘅事嘅話，好可能你已經以為馬田斯應該已經退左休，正路嘅因為佢已經離開左歐洲四大聯賽好幾年啦，所以要見到佢嘅身影一啲都唔容易。

不過呢位當年速度爆燈嘅射手，其實係仲未退役架，更加估唔到嘅係其實直家嘅佢就只有32歲，絕對仍然屬於當打之年，而佢目前就喺中超嘅上海申花效力。講真真係估唔到佢係咁後生，原來當年2001年加盟國米嘅佢就只有16歲，所以後來開始喺國米踢到為人所認識嘅時候，佢都係20歲未夠架。

雖然速度驚人，但係馬田斯嘅射門能力始於一般，所以好快國米就已經將佢賣去英超嘅紐卡素。但係由於佢嘅把握力都係無好大嘅進步，所以佢都係無辦法將自己提升為世界級嘅前鋒，好快佢亦淡出主流嘅球隊，離開紐卡素後佢曾分別效力過禾夫斯堡、魯賓卡山、伯明翰、利雲特，到之後更轉戰美職聯，再到去年佢更轉投中超球隊。

對於馬田斯嘅印象，我諗你同我都有一種好似佢已經退左休好耐嘅感覺，唔知係咪因為好似已經係好耐之前打機用過嘅人，所以感覺好似佢就係類似雲佬、亨利個啲前鋒咁已經退晒役咁。

睇到馬田斯原來仲踢緊，真係個心都有啲感慨，原來當年打機用佢已經喺10幾年前嘅事....真係唔認老都唔得啦。