{ SKIP }
文:MenClub Mr.波特  圖:互聯網
POSTED ON 21 Aug 2017


討論NBA球星邊個更加偉大一直係球迷最喜歡嘅話題之一,如果要講NBA歷史最大嘅球員,我諗支持者最多嘅應該就係6次奪得總冠軍及6次成為總決賽MVP嘅「籃球之神」Michael Jordan,呢個答案亦都必定係最多人順服嘅答案。不過,如果係Kobe Bryant同LeBron James邊個更偉大,唔知你又可唔可以即刻下定論呢?



近日,Jordan就曾經公開表示Kobe仍然比宜家嘅LeBron更加偉大,因為Kobe曾奪得5次總冠軍,而LeBron只有3次。係嘅,衡量一位球員偉唔偉大睇下佢嘅總冠軍數目係最直接嘅方法,但係呢個因素卻唔係唯一嘅因素,因為好似「關鍵先生」Robert Horry咁,佢就曾經7奪NBA總冠軍,咁唔通佢會比Jordan、Kobe或LeBron更加偉大咩?呢個我諗無人會同意。所以Jordan單靠總冠軍數目黎評論邊個更偉大就有啲唔夠客觀。咁樣究竟Kobe偉大啲定係LeBron偉大啲呢?


首先Kobe曾5奪總冠軍,並包括1次三連冠以及1次兩連冠,而其中兩次奪得總決賽MVP。而其他獎項,Kobe20年球員生涯只曾1次奪得常規賽MVP,另外佢曾經18次入選全明星賽,4次奪得明星賽MVP,11次入選年度最佳一陣,9次入選年度最佳防守一陣,2次成為得分王以及兩次帶領美國隊奪得奧運金牌。


Lebron James則曾三次奪得總冠軍,其中包括1次喺熱火時期嘅兩連冠,而比Kobe更出色嘅係佢三次奪冠都成為總決賽MVP。其他獎項方面,LeBron目前為止拎過4次常規賽MVP,13次入選全明星陣容,2次奪得明星賽MVP,11次入選年度最佳一陣,5次入選年度最佳防守一陣,1次成為得分王。而同Kobe一樣,LeBron亦同Kobe成為隊友奪得兩次奧運金牌,不過2004年奧運喺Kobe無參戰下,LeBron只能隨隊奪得一面銅牌。


睇完個人獎項,其實Kobe同LeBron都可以話係不相伯仲,Kobe總冠軍數領先,但LeBron就MVP數目大幅領先,而Kobe曾9次入選最佳防守一陣,亦說明佢嘅防守較LeBron更被關注。



睇完獎項,再睇下兩位嘅個人數據,首先係Kobe。Kobe作為一名NBA嘅超級得分手,佢喺常規賽生涯場均可以取得25分5.2籃板4.7助攻1.4抄截0.5封阻,如果唔係佢新秀賽季獲得嘅上陣機會較少拖累,相信佢嘅場均數據會更出色。而總計Kob生涯一共取得33643分7047籃板6306助攻1944抄截640封阻,其中得分目前排名NBA歷史第三位,僅次於「天勾」Jabbar同「郵差」Karl Malone。季後賽方面,Kobe曾參戰220場季後賽,場均可以取得25.6分5.1籃板4.7助攻1.4抄截0.7封阻,總計則取得5640分1119籃板1040助攻310抄截144封阻。


再睇LeBron,由於佢貴為新秀狀元,佢一加入NBA已經獲得重用,所以單係新秀賽季已經領先Kobe唔少,所以佢目前常規賽生涯場均可以取得27.1分7.3籃板7助攻1.6抄截0.8封阻,總計數據則為28787分7706籃板7461助攻1749抄截817封阻。季後賽方面,LeBron目前參加左217場賽事,場均可以拎到28.4分8.9籃板6.9助攻1.8抄截1封阻,總計則取得6163分1922籃板1489助攻389抄截209封阻。


可以睇到數據上,Kobe差唔多只係得番常規賽總得分大幅領先LeBron,其餘就係抄截領先200個左右,但係其餘數據LeBron都已經完全超過左Kobe,仲要LeBron宜家都仲未退役,所以有望可以進一步喺呢啲數據上拉開同Kobe嘅距離。



雖然Kobe未來可能會喺數據上被LeBron全面超過,但係Kobe有一樣野就係LeBron無嘅,就係殺手本能,Kobe嘅絕殺能力要比LeBron出色得多,而呢一點亦都係唔少球迷認為點解Kobe會比LeBron偉大。


不過,其實本質上兩位球員完全係唔同類型,Kobe係一名純粹嘅得分手,但係LeBron就係一位全能戰士,首要目的係令隊友變得更好,所以將兩位球員作對比又好似唔可以完全作出比較。作為球迷嘅你又點睇呢?你覺得Kobe偉大啲定係LeBron偉大啲呢?可能你會覺得宜家嘅LeBron仍然唔可以同Kobe比較,咁你又覺得當LeBron退役時,佢嘅偉大會唔會可以超過Kobe呢?


由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024