{ SKIP }
文:MenClub Mr.波特  圖:互聯網
POSTED ON 08 Aug 2017


如果你有睇今年英格蘭社區盾賽事嘅話,相信你應該有睇佢地個12碼對決,而你亦都應該唔太明究竟點解領隊干地會派門將高圖爾斯射第2球12碼。不過,其實除左唔明點解會派高圖爾斯射12碼之外,唔知球迷們又有無留意到今屆社區盾射12碼嘅方式同以往有啲唔同呢?無錯啦,今屆社區盾用嘅方式係最新嘅「ABBA」射12碼次序方法。



其實如果你有睇較早前喺香港舉辦嘅英超亞洲盃,賽事已經用左「ABBA」射12碼方式,所以其實都唔算真係完全未見過。以往射12碼嘅次序(ABAB...),都係由A球隊開始先射,然後到B球隊射,然後又到番A球隊射,如此類推。但係最新引入嘅「ABBA」射12碼次序方式,則係由A球隊先射第一球,然後由B球隊射接落黎嘅兩球,然後又到番A球隊射2球,如此類推。



「ABBA」射12碼次序嘅出現,係因為有唔少人認為,以往「ABAB」嘅射12碼次序,如果A球隊射入第1球,咁B球隊就會一直存在住巨大嘅壓力,因為佢地一直都係後追嘅一方,咁樣有違公平。而如今嘅「ABBA」射法,則係令射後嘅一方有機會成為領先嘅一方,同時雙方都係有機會做領先或後追嘅一方,所以較以往嘅「ABAB」方式更加公平。


係嘅,「ABBA」呢個方式可以解決左以往個種唔公平,但係亦同時衍生另外嘅問題,就係如果A球隊第一球射失,而B球隊就連入兩個12碼,咁樣對A球隊射第2球12碼嘅球員同樣會產生巨大嘅壓力。



對於呢種全新嘅射12碼次序,有人認為係好事,亦有人覺得其實無想像中咁好,其中包括前利物浦傳奇謝拉特。謝拉特喺阿仙奴成功拎到社區盾之後表示,佢係比較鍾意以往個套射12碼「ABAB」嘅方式,因為「ABAB」比較刺激同緊張,你一球我一球確實係比「ABBA」方式更緊張。


以往「ABAB」方式部份球隊都會選擇先射,因為正如上面提到嘅,先射嘅球隊壓力較細。不過,如今「ABBA」方式則令領隊更難決定射先定射後好。作為球迷,你又比較鍾意睇傳統嘅「ABAB」方式,定係如今全新更為公平嘅「ABBA」方式呢?






我很想打籃球呀!!
hobby
【永不放棄的人】三井戰山王工業籃球鞋登場!
20 Jul 2018
帕奎奧超越年齡再次登拳王寶座!
hobby
【超越年齡界限】菲律賓拳王帕奎奧39歲再登世界拳王寶座!
20 Jul 2018