{ SKIP }
文:MenClub Mr.波特  圖:互聯網
POSTED ON 11 Aug 2017

「呂布」伊巴謙莫域雖然已經35歲,但係佢嘅身體同埋表現都仍然處於頂級水平,所以即使目前因傷休養緊嘅佢趕唔切喺新球季開始時復出,但係仍然有唔少球隊對佢非常有興趣,其中包括無優先同佢續約嘅曼聯以及最新加入嘅AC米蘭。



喺今年4月嘅歐霸盃上,伊巴不幸膝蓋受傷,其後接受左手術,剛完成嘅時候醫生判定佢將至少休養至明年1月。正因為可能會缺陣半個球季,曼聯決定唔同伊巴提前續約,要睇下佢嘅康復程度再作決定。



不過,在完成手術後醫生們都出黎表示,伊巴身體異於常人,雖然佢已經踢左10幾年波,但係佢嘅膝蓋竟然絲毫無受損,完全唔似一個職業足球員。除此之外,亦有消息指伊巴身體回復力驚人,佢嘅回歸預計會較最開初講嘅明年1月要早唔少,甚至本來講可能係會提前至12月,到今日竟然話佢可以提前至10月就復出,情況未免太驚人。


正因為復元速度快得太誇張,有指摩連奴已經同伊巴展開新一輪嘅簽約談判,摩帥非常希望伊巴可以繼續為曼聯效力,咁樣新球季隨時可以睇到伊巴同盧卡古組成雙箭頭,咁樣曼聯嘅攻擊力就絕對獲得保證啦。



雖然摩帥同伊巴嘅關係非常好,但亦唔代表曼聯可以完全放心伊巴會回歸,因為其他球隊已經著手出招,希望招到呢位「瑞典神塔」,其中就包括今夏大灑金錢嘅意甲傳統豪門AC米蘭。米蘭今夏因為新班主入主,所以目前已經動用左超過1.5億歐元黎進行收購,但係佢地一啲都無諗住停落黎,甚至已經主動同伊巴經理人拉奧拉接觸。


據消息指,米蘭將為伊巴開出一份非常吸引嘅合同,合同由2018年1月至6月,其中呢6個月嘅薪金為100萬歐元,當然咁嘅價錢梗係唔吸引啦,但係米蘭會為伊巴每次出場給予100萬歐元嘅出場費,咁樣即係話如果伊巴呢6個月入面可以踢到20場比賽,咁佢就會拎到2000萬歐元嘅出場費,絕對係非常吸引嘅合同。



另外,值得一提嘅係米蘭嘅合同固然吸引,但係伊巴其實都係米蘭嘅舊部,所以佢對呢支球會仍都相當熟悉,所以由情方面出手仍都可以增加簽約嘅可能性。更加重要嘅係,米蘭雖然今夏買左好多人,但係就缺少左一位鎮得住場嘅前鋒,所以伊巴嘅到來可以令呢支米蘭變得更完整。


究竟最終伊巴會加入邊支球隊呢?重返曼聯定係再次加入米蘭呢?無論佢嘅決定係點,有佢加入嘅球隊實力都一定會變得更強大的。


消息來源:sempremilan.com


連載緊嘅《浪客劍心 北海道篇》立刻被中止,連電視翻播真人版電影都取消…
hobby
和月伸宏收藏兒童色情品被調查
24 Nov 2017
重量級拳王Joshua最高嘅一次訓練!
hobby
【世界最高訓練】重量級拳王Anthony Joshua杜拜帆船酒店練習!
24 Nov 2017