英文聆聽測驗 Eminem4分半鐘Rap數臭特朗普

文：MenClub 魏文青　　
POSTED ON 12 Oct 2017

Rap作為Hip Hop文化中重要嘅一環，素來都被Rapper用於表達對社會、政治、甚至個人生活中嘅不滿。甚至有人認為唔鬧人嘅Rap就唔算Rap。而要講到當代最強Rapper，Eminem一定佔一席位，近日有報導指呢位殿堂級Rapper喺BET(黑人娛樂電視)頒獎典禮中，憑一段充滿忿怒、長達四分半鐘Freestyle「激嬲過半美國人」喎，究竟佢鬧咗啲咩呢？

答案就係上任以黎幾乎每日都被人鬧緊嘅現任美國總統特朗普。BET頒獎典禮上播出Eminem喺底特律一個停車埸中拍嘅一條片，以一句「Calm before the storm(指特朗普近日同美國軍方高層晚宴時嘅一句謎之發言)」展開呢段四分半鐘嘅Freestyle，由特朗普嘅「白人至上」傾向，到近期佢多次喺Twitter譴責美國美式足球聯賽中有黑人球員拒絕向國旗致敬、再到拉斯維加斯槍擊案以及北韓嘅核威脅。簡單啲就講即係鬧得嘅嘢都鬧哂。如果你同Eminem一樣都係唔支持特朗普，咁你應該聽得幾開心。

佢甚至向Fans落「最後通牒」，叫佢哋只能支持佢或者特朗普，否則佢就會幫你落決定，就係「Fxxk you」再送你一隻中指。仲呼籲其他人站起來，指佢哋愛美國、愛軍人，就係好_憎特朗普。對比起好多人好地地講政治都有難度，Eminem竟然可以用Rap黎鬧而且仲鬧得言之有物。難怪好多人事後都叫佢「Rap God」。而如果你都想感受下Rap God有幾犀利，BET將整條片都放咗上Youtube。不過好可惜佢冇字幕，更加唔會特效話你知Eminem用咗單押雙押定三連拍，真係令人諗起當年考Listening嘅感覺。