【精神領域】身體狀態下滑又如何？！

文：MenClub 波特先生　　圖：互聯網
POSTED ON 02 Jan 2018

相信大家都有覺得，當年紀開始超過25歲後，身體機能總係感覺無以前咁好，唔同部位嘅痛處不斷攻擊你，體能亦不斷下跌，特別當你做運動嘅時候，你會覺得自己好似無以前咁多氣，跳又無跳得以前咁高，速度亦開始減慢。雖然唔想，但以上呢個情況絕對係所有人都避無可避，即使係職業運動員都一樣。

近日，勇士球星Kevin Durant接受訪問時表示，自己已經不再年輕，身體狀態並唔再處於顛峰，佢已經唔可以好似21、22歲咁，一起身就可以黎一次大風車入樽，現在嘅佢需要先做熱身，拉鬆左唔同部位嘅肌肉先可以做一啲大幅度嘅動作。

作為職業運動員都況且會係咁，更何況我地呢班普通人？如果我地上左年紀嘅身體仲用18、22嘅打法，相信你唔受傷都幾難。咁樣究竟點樣可以打贏呢班年輕力壯嘅青年人呢？答案就係食腦同靠經驗啦！

當你做一件事越耐，你獲得嘅經驗就會越多，你就會越容易做到更多唔同嘅事。好似NBA咁，年輕球員擁有極強體能，佢地可以輕鬆入樽或做一啲高難度動作，而老將雖然未必可以好似佢地咁飛黎飛去，但係就可以打得好聰明，例如會識到走到一個最適合嘅位置，又或以一個自己最舒服嘅方法黎得分，呢樣就係老將嘅價值。

除左個人能力之外，越多經驗代表你越明白隊友，知道佢地會走咩位、知道佢地得分嘅習慣、知道佢地在唔在狀態等等，呢啲都唔係一朝一夕就可以做到的，係需要長年累月不斷合作下先可以產生嘅默契，其實亦即係經驗。

所以，當你有感自己身體狀態開始下滑嘅時候，你可能就係時候要去諗點樣唔靠身體都可以做得更好啦。